ഇന്ത്യയിലെ മുന്നിര സിമന്റ് നിര്മ്മാതാക്കളായ അള്ട്രാടെക് സിമന്റ്, നാലാം പാദ ഫലങ്ങള്ക്കൊപ്പം നിക്ഷേപകര്ക്കായി വമ്പന് ലാഭവിഹിതം (Dividend) പ്രഖ്യാപിച്ചു. കമ്പനിയുടെ ചരിത്രത്തിലെ തന്നെ ഏറ്റവും ഉയര്ന്ന ഡിവിഡന്റ് പേഔട്ട് ആണിത്.
ഓരോ ഓഹരിക്കും 240 രൂപ വീതമാണ് ലാഭവിഹിതമായി ലഭിക്കുക. അതായത് 10 രൂപ ഫേസ് വാല്യൂ ഉള്ള ഓഹരിക്ക് 2400% ഡിവിഡന്റ് ആണ് കമ്പനി പ്രഖ്യാപിച്ചിരിക്കുന്നത്.
അള്ട്രാടെക് സിമന്റ് ഇതുവരെ നല്കിയിട്ടുള്ളതില് വെച്ച് ഏറ്റവും വലിയ തുകയാണിത്.
നാലാം പാദ ഫലങ്ങള്
കമ്പനിയുടെ നാലാം പാദത്തിലെ ലാഭം മുന്വര്ഷത്തെ അപേക്ഷിച്ച് 35 ശതമാനം വര്ധിച്ചു. 2,258 കോടി രൂപയാണ് ഇത്തവണത്തെ ലാഭം. കമ്പനിയുടെ മൊത്തം വരുമാനം 9 ശതമാനം ഉയര്ന്ന് 20,419 കോടി രൂപയിലെത്തി.
കമ്പനിയുടെ പ്രവര്ത്തനങ്ങളില് നിന്നുള്ള പണമൊഴുക്കിലെ ശക്തമായ വര്ധനയാണ് ഈ സ്പെഷ്യല് ഡിവിഡന്റ് നല്കാന് സഹായിച്ചതെന്ന് ബോര്ഡ് വ്യക്തമാക്കി. കഴിഞ്ഞ വര്ഷത്തെ അപേക്ഷിച്ച് ക്യാഷ്ഫ്ളോ 50 ശതമാനം വര്ധിച്ച് 14,398 കോടി രൂപയിലെത്തി. നിലവിലുള്ള മൂലധന ചെലവ് പദ്ധതികളെ (Capital Expenditure) ബാധിക്കാതെ തന്നെ ഓഹരി ഉടമകള്ക്ക് മികച്ച ലാഭവിഹിതം നല്കാന് ഇത് കമ്പനിയെ സഹായിച്ചു.
നിങ്ങളുടെ പോര്ട്ട്ഫോളിയോയില് ഈ ഓഹരിയുണ്ടോ?
സിമന്റ് രംഗത്തെ ഈ കരുത്തന് ഓഹരി നിങ്ങളുടെ കൈവശമുണ്ടെങ്കില് മികച്ചൊരു ‘പാസീവ് ഇന്കം’ (Passive Income) ഈ ഡിവിഡന്റിലൂടെ നിങ്ങള്ക്ക് സ്വന്തമാക്കാം. നിലവില് ഇന്ഫ്രാസ്ട്രക്ചര് മേഖലയിലുണ്ടാകുന്ന ഉണര്വ് അള്ട്രാടെക് സിമന്റിന് വരും വര്ഷങ്ങളിലും ഗുണകരമാകുമെന്നാണ് വിദഗ്ധരുടെ വിലയിരുത്തല്.
അള്ട്രാടെക് സിമന്റ് ഓഹരികള് ഇന്നലെ 0.10% വര്ധിച്ച് 12,010 രൂപയിലാണ് ക്ലോസ് ചെയ്തത്. ഇന്നലെ വിപണി സമയത്താണ് കമ്പനി തങ്ങളുടെ നാലാം പാദ ഫലങ്ങളും ഡിവിഡന്റ് സംബന്ധിച്ച വിവരങ്ങളും പുറത്തുവിട്ടത്.
കഴിഞ്ഞ അഞ്ച് വര്ഷത്തിനിടെ അള്ട്രാടെക് സിമന്റ് ഓഹരികള് 89 ശതമാനത്തിലധികം ലാഭം നല്കിയിട്ടുണ്ട്. കഴിഞ്ഞ മൂന്ന് വര്ഷത്തിനിടെ 59% നേട്ടമാണ് ഉണ്ടായത്. എന്നിരുന്നാലും, കഴിഞ്ഞ ഒരു വര്ഷത്തിനിടയില് ഓഹരി വിലയില് 1.9% ഇടിവുണ്ടായി.
2026-ല് ഇതുവരെയുള്ള കണക്കെടുത്താല് കമ്പനിയുടെ ഓഹരികള് 0.83% വര്ധന രേഖപ്പെടുത്തിയിട്ടുണ്ട്. കഴിഞ്ഞ ഒരു മാസത്തിനിടെ 8.6% ലാഭമാണ് ഓഹരി ഉടമകള്ക്ക് ലഭിച്ചത്.
