ഡൽഹി: സെർവർ ചിപ്പുകളുടെ ശക്തമായ ഡിമാൻഡിന്റെ പശ്ചാത്തലത്തിൽ രണ്ടാം പാദത്തിൽ 8.5 ബില്യൺ ഡോളറിന്റെ ലാഭം രേഖപ്പെടുത്തി സാംസങ് ഇലക്ട്രോണിക്സ്. മുൻ വർഷത്തെ അപേക്ഷിച്ച് ഇത് 15.2 ശതമാനം വർധിച്ചു. കമ്പനിയുടെ ഏപ്രിൽ-ജൂൺ കാലയളവിലെ പ്രവർത്തന ലാഭം 12.2 ശതമാനം ഉയർന്ന് 14.09 ട്രില്യൺ വോൺ ആയതായി കമ്പനി റെഗുലേറ്ററി ഫയലിംഗിൽ അറിയിച്ചു. കൂടാതെ, പ്രസ്തുത പാദത്തിൽ വരുമാനം 21.3 ശതമാനം ഉയർന്ന് 77.2 ട്രില്യൺ ആയി.
ലോകത്തിലെ ഏറ്റവും വലിയ മെമ്മറി ചിപ്പ്, സ്മാർട്ട്ഫോൺ നിർമ്മാതാക്കളായ തങ്ങളുടെ ചിപ്പ് വിഭാഗം 28.5 ട്രില്യൺ വരുമാനവും പ്രവർത്തന ലാഭത്തിൽ 9.98 ട്രില്യണും നേടിയതായി കമ്പനി അറിയിച്ചു. സെർവർ ക്ലയന്റുകളിൽ നിന്നുള്ള തുടർച്ചയായ ഡിമാൻഡ് പ്രതീക്ഷിച്ചതിലും മികച്ച പ്രകടനം കാഴ്ചവെയ്ക്കാൻ കമ്പനിയെ സഹായിച്ചു.
സാംസങ്ങിന്റെ ചിപ്പ് ബിസിനസിൽ നിന്നുള്ള പ്രവർത്തന ലാഭമാണ് മൊത്തം ലാഭത്തിന്റെ 70 ശതമാനം സംഭാവന ചെയ്തത്. ദക്ഷിണ കൊറിയൻ ടെക് ഭീമൻ അതിന്റെ ചിപ്പ് ബിസിനസ്സ് കൂടുതലും യുഎസ് ഡോളറിലാണ് ചെയ്യുന്നത്, എന്നാൽ അതിന്റെ വരുമാനം കൊറിയൻ വോണിലാണ് റിപ്പോർട്ട് ചെയ്യുന്നത്. യുഎസ് ഡോളറിനെതിരെയുള്ള ദുർബലമായ ദക്ഷിണ കൊറിയൻ കറൻസി പ്രവർത്തന ലാഭത്തിൽ ഏകദേശം 1.3 ട്രില്യണിന്റെ നേട്ടമുണ്ടാക്കാൻ സഹായിച്ചതായി സാംസങ് പറഞ്ഞു.
ആഗോള ഉപഭോക്താക്കൾക്ക് നൂതന ചിപ്പുകൾ വിതരണം ചെയ്യുന്നത് തുടരുന്നതിനാൽ അതിന്റെ ഫൗണ്ടറി ബിസിനസ്സ് എക്കാലത്തെയും ഉയർന്ന ത്രൈമാസ ലാഭം റിപ്പോർട്ട് ചെയ്തു. സാങ്കേതിക മത്സരശേഷി ശക്തിപ്പെടുത്തുന്നത് തുടരുന്നതിനിടയിൽ പുതിയ ആഗോള ക്ലയന്റുകളെ ചേർത്തുകൊണ്ട് വിപണി വളർച്ചയെ മറികടക്കാനാണ് തങ്ങൾ ലക്ഷ്യമിടുന്നതെന്ന് സാംസങ് പറഞ്ഞു. ഈ ആഴ്ച ഗേറ്റ്-ഓൾ-എറൗണ്ട് (GAA) സാങ്കേതികവിദ്യയിൽ നിർമ്മിച്ച 3-നാനോമീറ്റർ അർദ്ധചാലകങ്ങളുടെ ആദ്യ കയറ്റുമതി സാംസങ് നടത്തിയിരുന്നു.
സാംസംഗിന്റെ മൊബൈൽ, നെറ്റ്വർക്ക് ബിസിനസ്സ് രണ്ടാം പാദത്തിൽ 29.34 ട്രില്യൺ വരുമാനവും 2.62 ട്രില്യണിന്റെ പ്രവർത്തന ലാഭവും നേടി. അതേസമയം ഇതിന്റെ ഡിമാൻഡും ലാഭവും മുൻ പാദത്തേക്കാൾ കുറഞ്ഞു.
