ന്യൂഡൽഹി: കോർപ്പറേറ്റ് നികുതി പിരിവിലുണ്ടായ ശക്തമായ മുന്നേറ്റത്തിന്റെ കരുത്തിൽ നടപ്പ് സാമ്പത്തിക വർഷം സെപ്റ്റംബർ 17 വരെയുള്ള കാലയളവിൽ രാജ്യത്തെ നേരിട്ടുള്ള അറ്റ നികുതി പിരിവ് 13 ശതമാനം വർദ്ധിച്ച് 12.1 ലക്ഷം കോടി രൂപയിലെത്തി. മൊത്തം നികുതി പിരിവ് 15.2 ശതമാനം വർദ്ധിച്ച് 14.3 ലക്ഷം കോടി രൂപയായി ഉയർന്നിട്ടുണ്ട്.
സാമ്പത്തിക പ്രവർത്തനങ്ങളുടെ സൂചികയായ മുൻകൂർ നികുതി പേയ്മെന്റുകൾ 16.2 ശതമാനം ഉയർന്ന് 5.2 ലക്ഷം കോടി രൂപയായി. കമ്പനികളുടെ മുൻകൂർ നികുതി അടവ് 18.1 ശതമാനം വർദ്ധിച്ച് 4.2 ലക്ഷം കോടി രൂപയോടടുത്തു. സമ്പദ്വ്യവസ്ഥയുടെ വിവിധ മേഖലകളിലെ ഉയർന്ന വിൽപ്പനയും രണ്ടാം പാദത്തിൽ മികച്ച ലാഭക്ഷമതയുണ്ടാകുമെന്ന പ്രതീക്ഷയുമാണ് ഇതിന് കാരണം. വ്യക്തിഗത ആദായനികുതിയിലെ വളർച്ച മുൻപത്തെ 12.8 ശതമാനത്തിൽ നിന്ന് 9.2 ശതമാനമായി കുറഞ്ഞു.
അതേസമയം, നികുതി റീഫണ്ടുകളിൽ 29.2 ശതമാനം വളർച്ചയുണ്ടായിട്ടുണ്ട്. ആകെ 2.2 ലക്ഷം കോടി രൂപയാണ് റീഫണ്ടായി നൽകിയത്. ഇതിൽ വ്യക്തിഗത ആദായനികുതി റീഫണ്ടുകൾ ഇരട്ടിയിലധികം വർദ്ധിച്ച് 81,439 കോടി രൂപയായി. റീഫണ്ടുകൾ ഗണ്യമായി ഉയർന്നിട്ടും അറ്റ വരുമാനത്തിൽ വർദ്ധനവുണ്ടാകുന്നത് രാജ്യത്തെ വിപണി പ്രവർത്തനങ്ങളുടെ കരുത്താണ് കാണിക്കുന്നതെന്ന് സാമ്പത്തിക വിദഗ്ദ്ധർ ചൂണ്ടിക്കാട്ടുന്നു.
