കൊച്ചി: ന്യൂനപക്ഷ സമുദായങ്ങളിൽ നിന്നുളള സംരംഭകർക്കും വിവിധ തൊഴിൽ വിദഗ്ധർക്കും അവസരങ്ങളൊരുക്കുന്നതിനായി കേന്ദ്ര ന്യൂനപക്ഷകാര്യ മന്ത്രാലയം സംഘടിപ്പിക്കുന്ന ലോക് സംവർദ്ധൻ പർവിൻ്റെ അഞ്ചാം പതിപ്പിന് ഇന്ന് തുടക്കം. സെപ്റ്റംബർ 4 വരെ മറൈൻ ഡ്രൈവിൽ നടക്കുന്ന പരിപാടി വകുപ്പ് സഹമന്ത്രി ജോർജ് കുര്യൻ പരിപാടി ഉദ്ഘാടനം ചെയ്യും.
ന്യൂനപക്ഷ സമുദായങ്ങളിൽ നിന്നുള്ള കരകൗശല വിദഗ്ധർ,കരകൗശല തൊഴിലാളികൾ,നെയ്ത്തുകാർ, പാചക വിദഗ്ധർ,സംരംഭകർ എന്നിവർക്ക് വിപണി ബന്ധങ്ങളും ദേശീയ തലത്തിലുള്ള അവസരങ്ങളും ഒരുക്കിക്കൊടുക്കുന്നതിനായി രൂപകല്പന ചെയ്‌തിരിക്കുന്ന മന്ത്രാലയത്തിൻ്റെ ഒരു മുൻനിര സംരംഭമാണ് ലോക് സംവർദ്ധൻ പർവ്. അവരുടെ കല, കരകൗശലം, കഴിവുകൾ എന്നിവ പ്രദർശിപ്പിക്കുന്നതിനുള്ള ഒരു വേദി വാഗ്ദാനം ചെയ്യുന്നതിലൂടെ ഇന്ത്യയുടെ ഊർജസ്വലമായ വൈവിധ്യത്തെ ആഘോഷിക്കുന്നതിനൊപ്പം സാമ്പത്തിക ശാക്തീകരണവും ഇത് ശക്തിപ്പെടുത്തുന്നു. നഗരത്തിൻ്റെ കോസ്മോപൊളിറ്റൻ സ്വഭാവവും സംരംഭകത്വവും വൈവിധ്യവും പ്രതിഫലിപ്പിക്കുന്ന കേരളത്തിലെ ആദ്യത്തെ ലോക് സംവർദ്ധൻ പർവാണിത്.
10 ദിവസത്തെ മേളയിൽ രാജ്യത്തുടനീളമുള്ള നൂറിലധികം കരകൗശലത്തൊഴിലാളികളും 15 പാചക വിദഗ്ധരും അണിനിരക്കും. ഉത്തർപ്രദേശിലെ സരി,ചിക്കൻകാരി,പഞ്ചാബിലെ ഫുൽകാരി എംബ്രോയിഡറി,ബീഹാറിലെ മധുബനി പെയിൻ്റിംഗുകൾ,രാജസ്ഥാനിലെ നീല മൺ പാത്രങ്ങൾ തുടങ്ങി ലഡാക്കിൽ നിന്നുള്ള പശ്മിന നെയ്ത്ത്,ഛത്തീസ്ഗഢിൽ നിന്നുള്ള ബസ്തർ ഇരുമ്പ് കരകൗശല വസ്തുക്കൾ,കർണാടകയിൽ നിന്നുള്ള ചന്നപട്ടണ മരത്തടി കൊണ്ടുള്ള കളിപ്പാട്ടങ്ങൾ,കേരളത്തിൻ്റെ സ്വന്തം നെറ്റിപ്പട്ടം നിർമ്മാണം തുടങ്ങിയ പരമ്പരാഗത കരകൗശലങ്ങൾ മേളയിൽ പ്രദർശിപ്പിക്കും. പരമ്പരാഗത ഭക്ഷണങ്ങൾ, സുഗന്ധവ്യഞ്ജനങ്ങൾ,അച്ചാറുകൾ,ബേക്കറി ഉൽപ്പന്നങ്ങൾ,ഔഷധസസ്യങ്ങൾ,തീരദേശ വിഭവങ്ങൾ എന്നിവ ഉൾക്കൊള്ളുന്ന വിപുലമായ പാചക പ്രദർശനവും സന്ദർശകർക്ക് ആസ്വദിക്കാൻ കഴിയും. പ്രദർശനത്തോടൊപ്പം ന്യൂനപക്ഷ സമുദായങ്ങളുടെ സമ്പന്നമായ കലാ പൈതൃകത്തെ ഉയർത്തിക്കാട്ടുന്ന സാംസ്കാരിക പ്രകടനങ്ങളും തത്സമയ പ്രകടനങ്ങളും മേളയിൽ നടക്കും.
