ന്യൂഡല്ഹി: നിര്ണായക ധാതുക്കളുടെ പര്യവേക്ഷണവും ഖനനവും വേഗത്തിലാക്കാന് ലക്ഷ്യമിടുന്ന 2025 ലെ ഖനി, ധാതു (വികസന, നിയന്ത്രണ) ഭേദഗതി ബില് ലോക്സഭ പാസാക്കി. ബില് നിയമമാകുന്നതിന് രാജ്യസഭയുടെ അനുമതി നേടേണ്ടതുണ്ട്.
ഖനന പാട്ടക്കാരെ നിര്ണായക ധാതുക്കള് ഖനനം ചെയ്യാന് അനുവദിക്കുക, നാഷണല് മിനറല് എക്സ്പ്ലോറേഷന് ട്രസ്റ്റിന്റെ (NMET) വ്യാപ്തി വികസിപ്പിക്കുക, മിനറല്സ് എക്സ്ചേഞ്ച് തുറക്കുക എന്നിവയാണ് പ്രധാന ഭേദഗതികള്.
ധാതുക്കളുടെയും ലോഹങ്ങളുടെയും വ്യാപാരം സുഗമമാക്കുന്നതിന് നിര്ദ്ദിഷ്ട എക്സ്ചേഞ്ച് സഹായിക്കും. വ്യാപാര പ്രവര്ത്തനങ്ങളുടെ സമഗ്രമായ ഒരു ഡാറ്റാ ബാങ്ക് നിലനിര്ത്തുക, ഇന്സൈഡര് ട്രേഡിംഗും മാര്ക്കറ്റ് കൃത്രിമത്വവും തടയുന്നതിനുള്ള നിയന്ത്രണങ്ങള് ഉള്പ്പെടുത്തുക എന്നിവയായിരിക്കും എക്സ്ചേഞ്ചിന്റെ ചുമതലകള്.
ഇലക്ട്രിക് വാഹനങ്ങള്, ഇലക്ട്രോണിക്സ്, സെമികണ്ടക്ടറുകള്, ഡ്രോണുകള്, മറ്റ് വ്യാവസായിക, സൈനിക ഉപകരണങ്ങള് എന്നിവയില് ഉപയോഗിക്കുന്ന അപൂര്വ എര്ത്ത് ധാതുക്കള്ക്കായി ആഗോള മത്സരം കടുക്കുമ്പോഴാണ് ബില് അവതരിപ്പിക്കപ്പെടുന്നത്.
ലോകത്തിലെ അപൂര്വ എര്ത്ത് കാന്തങ്ങളുടെ 90 ശതമാനത്തിലധികവും പ്രദാനം ചെയ്യുന്ന ചൈന അതിന്റെ കയറ്റുമതി നിരോധിച്ചിരുന്നു. ഇതോടെ ഉത്പാദനം വെട്ടിക്കുറക്കാന് വാഹന നിര്മ്മാതാക്കളും ഇലക്ട്രോണിക് നിര്മ്മാതാക്കളും നിര്ബന്ധിതരാകുന്ന സാഹചര്യം ഉടലെടുത്തു.
നാഷണല് ക്രിട്ടിക്കല് മിനറല്സ് മിഷന് (NCMM) ത്വരിതപ്പെടുത്താന് നിര്ദ്ദിഷ്ട നിയമം സഹായിക്കുമെന്ന് പ്രതീക്ഷിക്കുന്നു. ഹരിത സാങ്കേതികവിദ്യകള്, പ്രതിരോധം, ഹൈടെക് വ്യവസായങ്ങള് എന്നിവയ്ക്ക് അത്യാവശ്യമായ നിര്ണായക ധാതുക്കള്ക്കായി പ്രതിരോധശേഷിയുള്ളതും സ്വാശ്രയവുമായ വിതരണ ശൃംഖല ഉറപ്പാക്കുക എന്നതാണ് എന്സിഎംഎം ലക്ഷ്യമിടുന്നത്.
34,300 കോടി രൂപയുടെ മിഷന് ജനുവരിയിലാണ് ക്യാബിനറ്റ് അംഗീകാരം നല്കുന്നത്. അതേസമയം നിര്ണായക ധാതു ദൗത്യത്തില് പങ്ക് പ്രതിഫലിപ്പിക്കുന്നതിനായി എന്സിഎംഎമ്മിന്റെ പേര് നാഷണല് മിനറല് എക്സ്പ്ലോറേഷന് ആന്ഡ് ഡെവലപ്മെന്റ് ട്രസ്റ്റ് എന്ന് മാറ്റാന് ബില് നിര്ദ്ദേശിക്കുന്നുണ്ട്.
ഖനി മന്ത്രാലയത്തിന് കീഴിലുള്ള എന്എംഇടി വിവിധ ധാതു പര്യവേക്ഷണ പദ്ധതികള്ക്ക് ധനസഹായം നല്കും.
