മുംബൈ: ഇന്ത്യയിലെ ലോജിസ്റ്റിക്‌സ്‌ മേഖല പുതിയ ഐപിഒ സൈക്കിളിലേക്ക്‌ കടക്കുന്നു. അര ഡസനിലേറെ ലോജിസ്റ്റിക്‌സ്‌ കമ്പനികളാണ്‌ പബ്ലിക്‌ ഇഷ്യു നടത്താന്‍ ഒരുങ്ങുന്നത്‌.
സ്‌കൈവേസ്‌ എയര്‍വേയ്‌സ്‌, സിജെ ഡാര്‍ഡ്‌ ലോജിസ്റ്റിക്‌സ്‌, ലീപ്‌ ഇന്ത്യ, കാലിബര്‍ മൈനിംഗ്‌ & ലോജിസ്റ്റിക്‌സ്‌, ഷിപ്പ്‌റോക്കറ്റ്‌, ഹൊറൈസണ്‍ ഇന്റസ്‌ട്രിയല്‍ പാര്‍ക്ക്‌സ്‌, യാതായത്‌ കോര്‍പ്പറേഷന്‍ എന്നീ ലോജിസ്റ്റിക്‌സ്‌ കമ്പനികള്‍ സെബിക്ക്‌ പ്രോസ്‌പെക്‌ടസ്‌ സമര്‍പ്പിച്ചു. ഈ കമ്പനികള്‍ മൊത്തം 8000-9000 കോടി രൂപയാണ്‌ ഐപിഒകള്‍ വഴി സമാഹരിക്കാന്‍ ലക്ഷ്യമിടുന്നത്‌.
അടുത്ത ത്രൈമാസങ്ങളില്‍ ഈ ഐപിഒകള്‍ വിപണിയിലെത്തുമെന്ന്‌ പ്രതീക്ഷിക്കുന്നു. ലോജിസ്റ്റിക്‌സ്‌ മേഖലയുടെ ശക്തമായ വളര്‍ച്ചയ്‌ക്ക്‌ അരങ്ങൊരുങ്ങിയിരിക്കുന്ന സാഹചര്യത്തിലാണ്‌ ഫണ്ട്‌ സമാഹരണം ലക്ഷ്യമിട്ട്‌ കൂടുതല്‍ ലോജിസ്റ്റിക്‌സ്‌ കമ്പനികള്‍ ലിസ്റ്റ് ചെയ്യാന്‍ ഒരുങ്ങുന്നത്‌.
നിലവില്‍ ഈ മേഖലയില്‍ നിന്ന്‌ എട്ട്‌ കമ്പനികള്‍ സ്റ്റോക്ക്‌ എക്‌സ്‌ചേഞ്ചുകളില്‍ ലിസ്റ്റ് ചെയ്‌തിട്ടുണ്ട്‌.
