കൊച്ചി: സൗത്ത് ഇന്ത്യൻ ബാങ്കിന്റെ സ്വതന്ത്ര ചുമതലയുള്ള അഡിഷണൽ ഡയറക്ടറായി (നോൺ എക്സിക്യൂട്ടീവ്) ജോസ് ജോസഫ് കാട്ടൂർ ഈ മാസം 18 മുതൽ നിയമിതനായി. മൂന്ന് വർഷത്തേക്കാണ് നിയമനം.
റിസർവ് ബാങ്ക് ഓഫ് ഇന്ത്യയുടെ എൻഫോഴ്സ്മെന്റ്, കോർപ്പറേറ്റ് സ്ട്രാറ്റജി, കറൻസി, എച്ച് ആർ വകുപ്പുകളുടെ എക്സിക്യൂട്ടീവ് ഡയറക്ടറായി സേവനമനുഷ്ഠിച്ചിട്ടുള്ള ജോസ് ജോസഫിന്, ബാങ്കിങ് മേഖലയിൽ മൂന്ന് പതിറ്റാണ്ടിലേറെ അനുഭവസമ്പത്തുണ്ട്.
വാർട്ടൻ യൂണിവേഴ്സിറ്റിയിൽനിന്നും അഡ്വാൻസ്ഡ് മാനേജ്മെന്റ് പ്രോഗ്രാം പൂർത്തീകരിച്ചിട്ടുണ്ട്. റൂറൽ മാനേജ്മെന്റിൽ ബിരുദാനന്തര ബിരുദത്തിന് പുറമേ ഐഐബിയിൽ സർട്ടിഫൈഡ് അസോസിയേറ്റ്, എൽഎൽബി, ബിഎസ്സി ബിരുദം എന്നിവയും കരസ്ഥമാക്കിയിട്ടുണ്ട്.
റിസീവബിൾ എക്സ്ചേഞ്ച് ഓഫ് ഇന്ത്യയുടെ (ആർഎക്സ്ഐഎൽ) സ്വതന്ത്ര ഡയറക്ടറായും നിയമ സഹായം നൽകുന്ന ഒരു പ്രമുഖ സ്ഥാപനത്തിന്റെ സീനിയർ കൺസൽട്ടന്റായും അദ്ദേഹം പ്രവർത്തിച്ചു വരുന്നു.
