ഭാവി സാധ്യതകളിൽ മാത്രമൂന്നിയ കമ്പനിയോ? ജിയോ ഫിനാൻഷ്യൽ സർവീസസ് നിക്ഷേപകർക്ക് നാലു ദിവസത്തെ നഷ്ടം 31,000 കോടി രൂപ.
റിലയൻസ് ഇൻഡസ്ട്രീസ് അനുബന്ധ സ്ഥാപനമായ ജിയോ ഫിനാൻഷ്യൽ സർവീസസ് വിപണി മൂല്യം എക്സ്ചേഞ്ചുകളിൽ ലിസ്റ്റ് ചെയ്തതിന് ശേഷം നാല് ദിവസത്തിനുള്ളിൽ 31,000 കോടി രൂപയിലധികം ഇടിഞ്ഞു. എന്നാൽ അഞ്ചാം ദിവസം ഓഹരി തിരിച്ചു കയറി. നാലു ശതമാനം വരെയാണ് ഓഹരി വില ഉയർന്നത്.
നിഷ്ക്രിയ ഫണ്ടുകളും ആക്റ്റീവ് മ്യൂച്വൽ ഫണ്ടുകളും ഓഹരി വിൽക്കാൻ സാധ്യതയുള്ളതിനാൽ, വ്യാഴാഴ്ച കമ്പനിയുടെ ഓഹരികൾ ബിഎസ്ഇയിൽ അഞ്ചു ശതമാനം താഴ്ന്നിരുന്നു.
ഇൻട്രാഡേ അടിസ്ഥാനത്തിൽ ഇപ്പോൾ ജെഎഫ്എസ് ഓഹരികൾ ട്രേഡ് ചെയ്യാൻ യോഗ്യമല്ലെന്ന് മേത്ത ഇക്വിറ്റീസ് വിഭാഗം റിസർച്ച് അനലിസ്റ്റ്- സീനിയർ വൈസ് പ്രസിഡൻറ് പ്രശാന്ത് തപ്സെ പറയുന്നു.
ലിസ്റ്റ് ചെയ്തതിനു ശേഷം ഓഹരികൾക്ക് 20 ശതമാനം നഷ്ടമുണ്ടായി. ഇൻഡെക്സ് ഫണ്ടുകൾ പോർട്ട്ഫോളിയോകൾ പുനസംഘടിപ്പിക്കുന്നതാണ് ഓഹരികളിലെ വിൽപ്പന സമ്മർദ്ദത്തിന് കാരണമായത്.
തുടർച്ചയായ നാലാം ട്രേഡിംഗ് സെഷനിലും ഓഹരികൾ ലോവർ സർക്യൂട്ടിലായിരുന്നു. കമ്പനിയുടെ വിപണി മൂല്യം ഇതോടെ 1.36 ലക്ഷം കോടി രൂപയായി കുറഞ്ഞിരുന്നു. ഇന്നത്തെ മുന്നേറ്റത്തോടെ വിപണി മൂല്യം 1.40 ലക്ഷം കോടി രൂപയിൽ എത്തി. ഇന്ന് മൂന്ന് ശതമാനം വില ഉയർന്ന് 221.60 രൂപയിലാണ് ക്ലോസ് ചെയ്തത്.
ഓഗസ്റ്റ് 28ന് ആണ് എല്ലാ കണ്ണുകളും ഉറ്റു നോക്കുന്ന റിലയൻസിൻെറ വാർഷിക പൊതുയോഗം. ഇതിന് ശേഷം മാത്രമേ ജിയോ ഫിനാൻഷ്യൽ സർവീസസിൻെറ ബിസിനസ് പ്ലാനിൽ എന്തെങ്കിലും പുരോഗതി പ്രതീക്ഷിക്കാനാകൂ എന്നാണ് സൂചന. ഇപ്പോൾ ഏതൊക്കെ മേഖലകളിലാണ് ബിസിനസസ് കേന്ദ്രീകരിക്കുക എന്നതിൽ വ്യക്തതയില്ല.
സെൻസെക്സും നിഫ്റ്റി 50യും ഉൾപ്പെടെ ബിഎസ്ഇയുടെയും എൻഎസ്ഇയുടെയും പ്രധാന സൂചികകളുടെ ഭാഗമാണ് ജെഎഫ്എസ്എൽ.
നേരത്തെ ഏഷ്യാ ഇൻഡെക്സ് പ്രൈവറ്റ് ലിമിറ്റഡ്, സെൻസെക്സ് ഉൾപ്പെടെ ബിഎസ്ഇയുടെ എല്ലാ പ്രധാന സൂചികകളിൽ നിന്നും ഓഹരികൾ നീക്കം ചെയ്യാനുള്ള തീരുമാനം മൂന്ന് ദിവസത്തേക്ക് കൂടെ മാറ്റിവച്ചിരുന്നു.
റിലയൻസ് ഇൻഡസ്ട്രീസ് സ്റ്റോക്കിൽ എക്സ്ചേഞ്ചുകൾ നടത്തിയ പ്രത്യേക പ്രീ-ഓപ്പൺ സെഷനിൽ ജെഎഫ്എസ് ഓഹരി വില 261.8 രൂപയായിരുന്നു. ഇതാണ് പിന്നീട് ഇടിഞ്ഞത്.
കമ്പനിയുടെ മാതൃസ്ഥാപനമായ റിലയൻസ് ഇൻഡസ്ട്രീസിന്റെ ഓഹരികൾ ബിഎസ്ഇയിൽ 2,4761 രൂപയിലാണ് വ്യാപാരം നടന്നത്. മുമ്പത്തെ ക്ലോസിനേക്കാൾ 0.72 ശതമാനം ഇടിവ്.
അതേസമയം ജിയോ ഫിനാൻഷ്യൽ സർവീസസിൻെറ 6.6 ശതമാനം ഓഹരികൾ കഴിഞ്ഞ ദിവസം എൽഐസി സ്വന്തമാക്കിയിരുന്നു.
