ചെക്ക്-ഇൻ ലഗേജില്ലാതെ, ക്യാബിൻ ബാഗേജ് മാത്രമായി യാത്ര ചെയ്യുന്ന എക്കണോമി ക്ലാസ് യാത്രക്കാർക്കായി ഇൻഡിഗോ ‘ഇൻഡിഗോ ലൈറ്റ്’ എന്ന പേരിൽ പുതിയ നിരക്ക് പ്രഖ്യാപിച്ചു. ജൂലൈ 15 മുതലുള്ള ആഭ്യന്തര, അന്തർദേശീയ യാത്രകൾക്ക് ഈ ആനുകൂല്യം ലഭ്യമാകും. ഉപയോഗിക്കുന്ന സേവനങ്ങൾക്ക് മാത്രം പണം ഈടാക്കുക എന്ന ലക്ഷ്യത്തോടെയാണ് ഈ പുതിയ നിരക്ക് അവതരിപ്പിച്ചിരിക്കുന്നത്. ചെക്ക്-ഇൻ ബാഗേജ് ആവശ്യമില്ലാത്ത യാത്രക്കാർക്ക് ഈ ആനുകൂല്യം ഏറെ പ്രയോജനപ്പെടും.
ജൂലൈ 1 മുതൽ ഔദ്യോഗിക വെബ്‌സൈറ്റ്, മൊബൈൽ ആപ്പ്, കസ്റ്റമർ കെയർ സെന്റർ എന്നിവ വഴി ടിക്കറ്റുകൾ ബുക്ക് ചെയ്യാമെന്ന് ഇൻഡിഗോ അറിയിച്ചു. ജൂലൈ 15 മുതലുള്ള യാത്രകൾക്കാണ് പുതിയ നിരക്ക് ബാധകമാകുക. ആഭ്യന്തര, അന്തർദേശീയ റൂട്ടുകളിലെ നേരിട്ടുള്ള സർവീസുകൾക്ക് ഈ ഓഫർ ലഭ്യമാകും. വൺ-വേ, റൗണ്ട് ട്രിപ്പ്, മൾട്ടിസിറ്റി യാത്രകൾക്കും ഇത് ബാധകമാകും. മുതിർന്നവർക്കും കുട്ടികൾക്കും ഒരുപോലെ ‘ഇൻഡിഗോ ലൈറ്റ്’ നിരക്കിൽ ടിക്കറ്റ് എടുക്കാവുന്നതാണ്.
അതേസമയം സാധാരണ ടിക്കറ്റ് നിരക്കുകകളെ അപേക്ഷിച്ച് ‘ഇൻഡിഗോ ലൈറ്റ് ഫെയർ’ തുകയിൽ വൻതോതിലുള്ള വ്യത്യാസം ഉണ്ടാകില്ലെന്നാണ് വിലയിരുത്തൽ.
