മുംബൈ: ആഗോള തലത്തിൽ ഇന്ന് ഏവരും ശ്രദ്ധിക്കുന്ന സമ്പദ്ഘടനയാണ് ഇന്ത്യയുടേത്. രാജ്യത്തിന്റെ മൊത്ത ആഭ്യന്തര ഉത്പാദനത്തിലെ (ജിഡിപി) വളർച്ചാ നിരക്കുകളും ഭാവിയിൽ വികസിക്കാനുള്ള ശക്തമായ സാധ്യതകളും ഇന്ത്യയെ വേറിട്ടതാക്കുന്നു.
ഇതിന്റെയൊക്കെ നേർ പ്രതിഫലനമാണ് ഇന്ത്യൻ ഓഹരി വിപണിയിലും കാണാനാകുന്നത്.
കഴിഞ്ഞ മൂന്ന് മാസക്കാലയളവിനിടെ പ്രകടമാകുന്ന റെക്കോഡ് കുതിപ്പിന്റെ പിൻബലത്തിൽ, മറ്റൊരു സുപ്രധാന നേട്ടത്തിന്റെ തൊട്ടരുകിലാണ് ആഭ്യന്തര ഓഹരി വിപണി ഇപ്പോഴുള്ളത്.
5 ട്രില്യൺ ഡോളർ
ഇന്ത്യയിൽ ലിസ്റ്റ് ചെയ്യപ്പെട്ട ഓഹരികളുടെ മൊത്തം വിപണി മൂല്യം 5 ട്രില്യൺ ഡോളർ എന്ന നാഴികക്കല്ല് മറികടക്കാനുളള ശ്രമത്തിലാണ്. ഒരു ട്രില്യൺ എന്നാൽ ഒരു ലക്ഷം കോടി എന്നാണ് അർത്ഥമാക്കുന്നത്.
അതുകൊണ്ട് 5 ട്രില്യൺ ഡോളർ ഇന്നത്തെ വിനിമയ നിരക്കിൽ ഏകദേശം 415 ലക്ഷം കോടി രൂപയാണ്. നിലവിൽ ഇന്ത്യൻ ഓഹരികളുടെ മൊത്തം വിപണി മൂല്യം 4.8 ട്രില്യൺ ഡോളറിലെത്തി നിൽക്കുന്നു.
ഇപ്പോൾ ആഭ്യന്തര ഓഹരി വിപണിയിൽ പ്രകടമാകുന്ന കുതിപ്പ് നിലനിർത്താൻ സാധിച്ചാൽ, മാർച്ച് മാസത്തോടെ വിപണി മൂല്യം 5 ട്രില്യൺ ഡോളർ നാഴികക്കല്ല് മറികടക്കാനാകും. 2023 നവംബർ 29നാണ് ഇന്ത്യൻ ഓഹരി വിപണിയുടെ മൂല്യം 4 ട്രില്യൺ ഡോളർ നിലവാരം മറികടന്നത്.
തുടർന്നിങ്ങോട്ടുള്ള മൂന്ന് മാസം കൊണ്ട് 80,000 കോടി ഡോളറാണ് (ഏകദേശം 66.4 ലക്ഷം കോടി രൂപ) ഇന്ത്യൻ ഓഹരികളുടെ മൊത്തം വിപണി മൂല്യത്തിൽ വർധന ഉണ്ടായിരിക്കുന്നത്.
2030ഓടെ 10 ട്രില്യൺ ഡോളർ?
2007ലാണ് ഇന്ത്യൻ ഓഹരികളുടെ മൊത്തം വിപണി മൂല്യം ഒരു ട്രില്യൺ ഡോളർ എന്ന നേട്ടം ആദ്യമായി കരസ്ഥമാക്കിയത്. തുടർന്ന് 10 വർഷമെടുത്താണ് (2017 മേയ് 16) വിപണി മൂല്യം രണ്ട് ട്രില്യൺ ഡോളർ മറികടന്നത്.
2021 മേയ് 24ന് ഇന്ത്യൻ വിപണിയുടെ മൂല്യം മൂന്ന് ട്രില്യൺ ഡോളർ കവിഞ്ഞു. 2023 നവംബർ 29ന് നാല് ട്രില്യൺ ഡോളറിലും എത്തിച്ചേ‌ർന്നു.
കഴിഞ്ഞ 15 – 20 വർഷ കാലയളവിൽ ഇന്ത്യൻ ഓഹരി വിപണി കൈവരിച്ച നേട്ടവും വളർച്ചയും പുതിയ കമ്പനികളുടെ ലിസ്റ്റിങ്ങും ഒക്കെ അടിസ്ഥാനമാക്കി നോക്കുമ്പോൾ 2030-ഓടെ ആഭ്യന്തര ഓഹരികളുടെ വിപണി മൂല്യം 10 ട്രില്യൺ ഡോളർ എന്ന ചരിത്ര നേട്ടത്തിലേക്ക് എത്തിച്ചേരാം എന്നാണ് വിപണി വിദഗ്ധർ ഇതിനകം സൂചിപ്പിച്ചിട്ടുള്ളത്.
