കൊച്ചി: ആഭ്യന്തര വിപണിയിൽ ഇന്ധനം കിഴിവിൽ വിറ്റതിനെ തുടർന്ന് ചെലവ് കുതിച്ചുയർന്നതിനാൽ 2022 ജൂൺ 30 ന് അവസാനിച്ച പാദത്തിൽ ഇന്ത്യയിലെ മുൻനിര ഓയിൽ റിഫൈനറിയായ ഇന്ത്യൻ ഓയിൽ 1,993 കോടി രൂപയുടെ നഷ്ടം രേഖപ്പെടുത്തി. കഴിഞ്ഞ വർഷം ഇതേ കാലയളവിൽ കമ്പനിയുടെ ലാഭം 5,941 കോടി രൂപയായിരുന്നു.
എന്നിരുന്നാലും കമ്പനിയുടെ പ്രവർത്തനങ്ങളിൽ നിന്നുള്ള ഐഒസിയുടെ വരുമാനം പ്രസ്തുത പാദത്തിൽ 62.4 ശതമാനം ഉയർന്ന് 2,51,933 കോടി രൂപയായി. മുൻ വർഷം ഇത് 1,55,056 കോടി രൂപയായിരുന്നു. കമ്പനിയുടെ മൊത്ത ശുദ്ധീകരണ മാർജിൻ ജൂൺ വരെയുള്ള മൂന്ന് മാസങ്ങളിൽ ബാരലിന് 31.81 ഡോളറായിരുന്നു, ഒരു വർഷം മുമ്പ് ഇത് ബാരലിന് 6.58 ഡോളറായിരുന്നു.
ഇന്ത്യൻ ഓയിലും അതിന്റെ യൂണിറ്റായ ചെന്നൈ പെട്രോളിയവും ചേർന്ന് ഇന്ത്യയുടെ പ്രതിദിന ബാരൽ ശുദ്ധീകരണ ശേഷിയുടെ മൂന്നിലൊന്ന് നിയന്ത്രിക്കുന്നു. ഐഒസി, ഹിന്ദുസ്ഥാൻ പെട്രോളിയം കോർപ്പറേഷൻ, ഭാരത് പെട്രോളിയം കോർപ്പറേഷൻ തുടങ്ങിയ ഇന്ത്യൻ ഇന്ധന ചില്ലറ വ്യാപാരികൾ ആഗോള ക്രൂഡ് വിലക്കയറ്റത്തിൽ നിന്ന് ഉപഭോക്താക്കളെ ഒഴിവാക്കുന്നതിനായി മാസങ്ങളായി പമ്പ് വില പുതുക്കിയിട്ടില്ല, ഇത് പണപ്പെരുപ്പത്തിന്റെ ആഘാതം ലഘൂകരിക്കാനുള്ള സർക്കാരിന്റെ ശ്രമങ്ങളെ സഹായിക്കുന്നു.
അതേസമയം വെള്ളിയാഴ്ച ഐഒസിയുടെ ഓഹരികൾ ബിഎസ്ഇയിൽ 1.18 ശതമാനം ഉയർന്ന് 72.95 രൂപയിലാണ് വ്യാപാരം അവസാനിപ്പിച്ചത്. ഇന്ത്യൻ ഓയിൽ കോർപ്പറേഷൻ ലിമിറ്റഡ് ഇന്ത്യയുടെ മുൻനിര ദേശീയ എണ്ണ കമ്പനിയും ഡൗൺസ്ട്രീം പെട്രോളിയം പ്രമുഖരുമാണ്. രാജ്യത്തെ ഏറ്റവും വലുതും വിശാലവുമായ പെട്രോൾ, ഡീസൽ സ്റ്റേഷനുകളുടെ ശൃംഖലയാണ് കമ്പനി നടത്തുന്നത്.
