ന്യൂഡല്‍ഹി: എല്‍നിനോ ആഘാതത്തെക്കുറിച്ച് ആര്‍ബിഐ (റിസര്‍വ് ബാങ്ക് ഓഫ് ഇന്ത്യ) ഗവര്‍ണര്‍ ആശങ്ക പ്രകടിപ്പിച്ചതിനെ തുടര്‍ന്ന് നിഫ്റ്റി എഫ്എംസിജി സൂചിക ഇടിവ് നേരിട്ടു. 1 ശതമാനത്തോളം താഴ്ന്നാണ് സൂചിക ക്ലോസ് ചെയ്തത്. മണ്‍സൂണ്‍ ലഭ്യത, എല്‍നിനോ എന്നിവ സംബന്ധിച്ച് ആശങ്കകള്‍ നിലനില്‍ക്കുന്നതായി ആര്‍ബിഐ ഗവര്‍ണര്‍ ശക്തികാന്ത ദാസ് അറിയിക്കുകയായിരുന്നു.
എഫ്എംസിജി ഉല്‍പ്പന്നങ്ങളില്‍ ഉപയോഗിക്കുന്ന പ്രധാന ചരക്കുകളായ പഞ്ചസാര, അരി, ക്രൂഡ് ഓയില്‍ എന്നിവയുടെ വിലയിലെ അനിശ്ചിതത്വത്തെക്കുറിച്ച് ദാസ് സംസാരിച്ചു. തുടര്‍ന്ന് ഹിന്ദുസ്ഥാന്‍ യൂണിലിവര്‍ 1.17 ശതമാനം ഇടിവ് നേരിട്ട് 2684 രൂപയിലെത്തി. നെസ്ലെ ഇന്ത്യ, ടാറ്റ കണ്‍സ്യുമര്‍ എന്നിവ യഥാക്രമം 0.8 ശതമാനം,0.9 ശതമാനം എന്നിങ്ങനെയും മാരിക്കോ 0.79 ശതമാനവും പതഞ്ജലി ഫുഡ്സ് 0.99 ശതമാനവും ഐടിസി 0.24 ശതമാനവുമാണ് ഇടിവ് നേരിട്ടത്.
ഇന്ത്യന്‍ ജിഡിപിയുടെ ഭൂരിഭാഗവും സംഭാവന ചെയ്യുന്ന കാര്‍ഷി കമേഖല മണ്‍സൂണിനെ ആശ്രയിച്ചാണ് നിലനില്‍ക്കുന്നത്. എല്‍നിനോ ആഘാതമുണ്ടാകുന്ന പക്ഷം വിളവെടുപ്പ് മോശമാകുകയും അത് ഗ്രാമീണ ഡിമാന്റ് കുറയ്ക്കുകയും ചെയ്യും. നിലവില്‍ ഗ്രാമീണ ഡിമാന്റ് മോശം അവസ്ഥയിലാണ്.
സമീപ ഭാവിയില്‍ അത് വീണ്ടെടുക്കുമെന്ന് പ്രതീക്ഷിക്കുമ്പോഴാണ് എല്‍നിനോയെ സംബന്ധിച്ച വാര്‍ത്തകള്‍ വരുന്നത്.
