കൊച്ചി: ജനുവരിയിൽ ഇന്ത്യയിലെ ആഭ്യന്തര വിമാന യാത്രക്കാരുടെ എണ്ണം 4.7 ശതമാനം ഉയർന്ന് 1.31 കോടിയിലെത്തി. കഴിഞ്ഞ വർഷം ജനുവരിയിൽ 1.25 കോടി വിമാനയാത്രക്കാരാണ് ഉണ്ടായിരുന്നത്.
ഇൻഡിഗോ, എയർ ഇന്ത്യ, വിസ്താര, സ്പൈസ്ജെറ്റ് എന്നീ മുൻനിര വ്യോമയാന കമ്പനികളിലെ യാത്രക്കാരുടെ എണ്ണമാണിത്. രാജ്യത്തെ ആഭ്യന്തര വ്യോമയാന വിപണിയുടെ 60.2 ശതമാനം വിഹിതവും ഇൻഡിഗോയ്ക്കാണ്. 12.2 ശതമാനം വിപണി വിഹിതവുമായി എയർ ഇന്ത്യ രണ്ടാം സ്ഥാനത്തുണ്ട്.
ടിക്കറ്റ് റദ്ദാക്കുന്നവരുടെ എണ്ണത്തിൽ ജനുവരിയിൽ ഗണ്യമായ കുറവുണ്ടായെന്നും കണക്കുകൾ സൂചിപ്പിക്കുന്നു.
സാമ്പത്തിക മേഖല മികച്ച വളർച്ച നേടുന്നതിനൊപ്പം വിനോദ സഞ്ചാര വിപണിയിലെ ഉണർവും ആഭ്യന്തര വിമാനയാത്രക്കാരുടെ എണ്ണം കുതിച്ചുയരാൻ സഹായിച്ചു.
