ന്യൂഡൽഹി: ഗോതമ്പിന്റെയും അനുബന്ധ ഉൽപ്പന്നങ്ങളുടെയും കയറ്റുമതി നിയന്ത്രണങ്ങൾ കേന്ദ്ര സർക്കാർ പൂർണ്ണമായി നീക്കിയതിന് പിന്നാലെ രാജ്യത്തെ ആഭ്യന്തര വിപണിയിൽ ഗോതമ്പ് വിലയിൽ വർധന.
പ്രമുഖ വിപണികളിൽ ക്വിന്റലിന് ഏകദേശം 150 രൂപ വരെയാണ് വില ഉയർന്നിരിക്കുന്നത്. വർഷങ്ങളായി നിലനിന്നിരുന്ന കർശന നിയന്ത്രണങ്ങൾ പിൻവലിച്ചതോടെ വിദേശ രാജ്യങ്ങളിലേക്ക് ഇന്ത്യൻ ഗോതമ്പ് കയറ്റി അയക്കാനുള്ള സാധ്യതകൾ വ്യാപാരികൾ സജീവമായി പരിശോധിച്ചുതുടങ്ങിയിട്ടുണ്ട്.
മുൻപ് നിരോധിത വിഭാഗത്തിലായിരുന്ന ഗോതമ്പ്, ഡുറം ഗോതമ്പ് എന്നിവയുടെ കയറ്റുമതി നയം ഇപ്പോൾ സർക്കാർ സ്വതന്ത്ര വിഭാഗത്തിലേക്ക് മാറ്റിയിട്ടുണ്ട്. ഇതിനുപുറമെ മാവ്, മൈദ, റവ തുടങ്ങിയ അനുബന്ധ ഉൽപ്പന്നങ്ങളുടെ കയറ്റുമതിക്കും അനുമതി ലഭിച്ചിട്ടുണ്ട്.
രാജ്യത്ത് ഗോതമ്പ് ശേഖരം സുരക്ഷിതമാണെന്നും, കർഷകർക്ക് കൂടുതൽ മെച്ചപ്പെട്ട വില ഉറപ്പാക്കുന്നതിന്റെ ഭാഗമായാണ് പുതിയ ഇളവുകൾ പ്രഖ്യാപിച്ചതെന്നും അധികൃതർ വ്യക്തമാക്കുന്നു.
ആഗോളതലത്തിൽ കരിങ്കടൽ മേഖലയിലെ തടസ്സങ്ങൾ കാരണം ധാന്യ ലഭ്യത കുറഞ്ഞിരിക്കുന്ന സാഹചര്യം ഇന്ത്യക്ക് പുതിയ വിപണി സാധ്യതകൾ തുറന്നുനൽകുന്നുണ്ട്. പ്രത്യേകിച്ചും ബംഗ്ലാദേശ് ഉൾപ്പെടെയുള്ള രാജ്യങ്ങളിൽ ഇന്ത്യൻ ഗോതമ്പിന് ആവശ്യകത വർധിക്കുമെന്നാണ് പ്രതീക്ഷിക്കുന്നത്.
അതേസമയം, ആഭ്യന്തര വിപണിയിൽ ഗോതമ്പ് വില അമിതമായി കുതിച്ചുയരാത്ത രീതിയിൽ വിപണിയെ സൂക്ഷ്മമായി നിരീക്ഷിക്കാനും സർക്കാർ നടപടികൾ സ്വീകരിക്കുന്നുണ്ട്.
