ബാങ്ക് ഓഫ് ബറോഡ 2026 സാമ്പത്തിക വർഷത്തിന്റെ നാലാം പാദത്തിൽ മികച്ച പ്രവർത്തന ലാഭം കൈവരിച്ചു. മുൻ വർഷം ഇതേ കാലയളവിലെ 5,047.7 കോടി രൂപയിൽ നിന്ന് അറ്റാദായം 11.3 ശതമാനം വർധിച്ച് 5,615.7 കോടി രൂപയിലെത്തി.
ബാങ്കിന്റെ അറ്റ പലിശ വരുമാനത്തിൽ 8.7 ശതമാനം വർധനവുണ്ടായതോടെ ഇത് 12,493 കോടി രൂപയായും ഉയർന്നു. മികച്ച സാമ്പത്തിക നേട്ടത്തിന്റെ പശ്ചാത്തലത്തിൽ ഓഹരിയൊന്നിന് 8.5 രൂപ വീതം ലാഭവിഹിതം നൽകാനും ബാങ്ക് ശുപാർശ ചെയ്തിട്ടുണ്ട്. വെള്ളിയാഴ്ചത്തെ വ്യാപാരത്തിൽ ബാങ്കിന്റെ ഓഹരി വില 263.50 രൂപയിലാണ് ക്ലോസ് ചെയ്തത്.
ലാഭത്തോടൊപ്പം ബാങ്കിന്റെ ആസ്തി ഗുണനിലവാരത്തിലും ശ്രദ്ധേയമായ പുരോഗതിയുണ്ടായിട്ടുണ്ട്. നിഷ്‌ക്രിയ ആസ്തികൾ കുറയ്ക്കുന്നതിൽ ബാങ്ക് വിജയിച്ചു. കഴിഞ്ഞ വർഷം 6,994 കോടി രൂപയായിരുന്ന അറ്റ നിഷ്‌ക്രിയ ആസ്തി ഇത്തവണ 6,315 കോടി രൂപയായി കുറഞ്ഞു.
ബാങ്കിന്റെ മൊത്തം വരുമാനം 36,608 കോടി രൂപയായും ഇപിഎസ് 10.86 രൂപയായും വർധിച്ചിട്ടുണ്ട്. മൊത്ത നിഷ്‌ക്രിയ ആസ്തി അനുപാതം രണ്ട് ശതമാനത്തിൽ താഴെയായി നിലനിർത്താൻ സാധിച്ചത് വായ്പാ ഇടപാടുകളിലെ ബാങ്കിന്റെ കരുത്തിനെയാണ് സൂചിപ്പിക്കുന്നത്.
