ന്യൂഡല്ഹി: ആര്ബിഐ വീണ്ടും 50 ബേസിസ് പോയിന്റ് നിരക്ക് വര്ദ്ധനയ്ക്ക് തയ്യാറായേക്കും. റീട്ടെയില് പണപ്പെരുപ്പം രൂക്ഷമായതിന്റെ പശ്ചാത്തലത്തിലാണിത്. 50 ബിപിഎസ് പോയിന്റ് നിരക്ക് വര്ധനയ്ക്ക് ആര്ബിഐ തയ്യാറായേക്കുമെന്ന് എച്ച്എസ്ബിസി ഒരു കുറിപ്പില് പറയുന്നു.
റിപ്പോ നിരക്ക് 6.4 ശതമാനമാക്കാന് ഇതോടെ കേന്ദ്രബാങ്കിനാകും. വ്യാവസായിക വളര്ച്ച ഓഗസ്റ്റില് നെഗറ്റീവ് മേഖലയിലേയ്ക്ക് വീണത് ഡിസംബറില് ചേരുന്ന ആര്ബിഐ മോണിറ്ററി കമ്മിറ്റിയോഗത്തെ പിടിച്ചുലയ്ക്കുമെന്നും വിദഗ്ധര് അഭിപ്രായപ്പെട്ടു. എന്നാല് ഒക്ടോബറിലെ പണപ്പെരുപ്പവും നവംബര് അവസാന വാരത്തില് പുറത്തുവരുന്ന രണ്ടാം പാദ ജിഡിപി വളര്ച്ചയും പരിഗണിച്ചുമാത്രമേ എന്തെങ്കിലും തീരുമാനമുണ്ടാകൂ.
സെപ്തംബറില് ഉപഭോക്തൃ സൂചിക പണപ്പെരുപ്പം 5 മാസത്തെ ഉയരമായ 7.4 രേഖപ്പെടുത്തിയിരുന്നു. ധാന്യ, ഭക്ഷ്യവിലയാണ് പ്രധാനമായും പണപ്പെരുപ്പമുണ്ടാക്കുന്നത്. തുടര്ച്ചയായ ഒന്പതാം മാസം പണപ്പെരുപ്പം ടോളറന്സ് പരിധിയായ 2-6 ശതമാനത്തിന് മുകളിലായതോടെ സര്ക്കാറിന് വിശദീകരണം നല്കാന് കേന്ദ്രബാങ്ക് നിര്ബന്ധിതരായി.
പണപ്പെരുപ്പം നിയന്ത്രിക്കാന് സാധിക്കാത്തതിന്റെ കാരണങ്ങളും പരിഹാരമാര്ഗ്ഗങ്ങളുമാണ് വിശദീകരണ കത്തില് ഇടം പിടിക്കുക.
