ലിസ്‌റ്റിങ്ങിന്‌ മുമ്പ്‌ നിക്ഷേപകര്‍ കൈവശംവെച്ചിരുന്ന വലിയൊരു വിഭാഗം ഓഹരികള്‍ അടുത്ത മൂന്ന്‌ മാസത്തിനിടെ വില്‍പ്പനയ്‌ക്ക്‌ യോഗ്യമാകും. ഒക്‌ടോബര്‍ 5 മുതല്‍ ഡിസംബര്‍ 29 വരെ 91 കമ്പനികളുടെ ഓഹരികളുടെ ലോക്ക്‌-ഇന്‍ കാലാവധി അവസാനിക്കും.
ഏകദേശം 14 ബില്യണ്‍ ഡോളര്‍ മൂല്യമുള്ള ഓഹരികളാണ്‌ ഇതിലൂടെ വ്യാപാരത്തിന്‌ അര്‍ഹമാകുന്നത്‌. എന്നാല്‍, ലോക്ക്‌-ഇന്‍ കാലാവധി അവസാനിക്കുന്ന ഓഹരികളുടെ ആകെ മൂല്യമാണിത്‌.
ഈ ഓഹരികളെല്ലാം വിപണിയില്‍ വില്‍പ്പനയ്‌ക്ക്‌ എത്തുമെന്ന്‌ ഇതിനര്‍ഥമില്ല. ഈ ഓഹരികളില്‍ വലിയൊരു വിഭാഗം പ്രൊമോട്ടര്‍മാരുടെയും പ്രൊമോട്ടര്‍ ഗ്രൂപ്പുകളുടെയും കൈവശമാണ്‌. സെന്‍ട്രല്‍ മൈന്‍ പ്ലാനിങ്‌ ആന്‍ഡ്‌ ഡിസൈന്‍ ഇന്‍സ്‌റ്റിറ്റിയൂട്ടില്‍ ഒക്‌ടോബര്‍ 6ന്‌ 46.4 കോടി ഓഹരികളുടെ ലോക്ക്‌-ഇന്‍ കാലാവധി അവസാനിക്കും.
കമ്പനിയുടെ മൊത്തം ഓഹരികളുടെ 65 ശതമാനമാണിത്‌. സായി പാരന്ററലിന്റെ 2.1 കോടി ഓഹരികള്‍, അതായത്‌ 48 ശതമാനം, ഇതേ ദിവസം ലോക്ക്‌-ഇന്‍ കാലാവധി അവസാനിച്ച്‌ വില്‍പ്പനയ്‌ക്ക്‌ യോഗ്യമാകും.
ഒക്‌ടോബറില്‍ ലോക്ക്‌ ഇന്‍ പീരിയഡ്‌ അവസാനിക്കുന്ന ശ്രദ്ധേയമായ കമ്പനികളിലൊന്ന്‌ റെന്റോമോജോ ആണ്‌. ഈ കമ്പനിയുടെം 50 ലക്ഷം ഓഹരികള്‍, അതായത്‌ 4 ശതമാനം, ഒക്‌ടോബര്‍ 15ന്‌ ലോക്ക്‌-ഇന്‍ കാലാവധി കഴിഞ്ഞ്‌ വ്യാപാര യോഗ്യമാകും. പര്‍പ്പിള്‍ സ്‌റ്റൈല്‍ ലാബ്‌സിന്റെ 30 ലക്ഷം ഓഹരികള്‍ക്ക്‌, അതായത്‌ 3 ശതമാനം, ഒക്‌ടോബര്‍ 5ന്‌ ലോക്ക്‌-ഇന്‍ കാലാവധി അവസാനിക്കും.
എസ്‌ബിഐ ഫണ്ട്‌സ്‌ മാനേജ്‌മെന്റിന്റെ 2.3 കോടി ഓഹരികളാണ്‌ ഒക്‌ടോബര്‍ 16ന്‌ ലോക്ക്‌-ഇന്‍ കാലാവധിയില്‍ നിന്ന്‌ മുക്തമാകുന്നത്‌. അതേ സമയം കമ്പനിയുടെ മൊത്തം ഓഹരികളുടെ ഒരു ശതമാനം മാത്രമാണിത്‌. നവംബറിലും ഡിസംബറിലും ഈ പ്രവാഹം തുടരും.
ജൂനിപ്പര്‍ ഗ്രീന്‍ എനര്‍ജിയുടെ 1.2 കോടി ഓഹരികള്‍, അതായത്‌ 2 ശതമാനം, നവംബര്‍ 2ന്‌ ലോക്ക്‌-ഇന്‍ കാലാവധി അവസാനിക്കും. ധൂത്‌ ട്രാന്‍സ്‌മിഷന്റെ 50 ലക്ഷം ഓഹരികള്‍, അതായത്‌ 3 ശതമാനം, നവംബര്‍ 11ന്‌ വില്‍പ്പനയ്‌ക്ക്‌ യോഗ്യമാകും. മില്‍കി മിസ്‌റ്റ്‌ ഡയറി ഫുഡിന്റെ 1.7 കോടി ഓഹരികള്‍, അതായത്‌ 2 ശതമാനം, നവംബര്‍ 12ന്‌ ലോക്ക്‌-ഇന്‍ കാലാവധിയില്‍ നിന്ന്‌ പുറത്തുവരും.
എന്‍എസ്‌ഇയുടെ 10 ലക്ഷം ഓഹരികള്‍, അതായത്‌ 0.1 ശതമാനം, നവംബര്‍ 20ന്‌ ലോക്ക്‌-ഇന്‍ കാലാവധി അവസാനിക്കും.
