വോഡഫോൺ ഐഡിയ (Vi) ഓഹരികൾ വ്യാപാരത്തിനിടെ 6 ശതമാനം ഉയർന്ന് 52 ആഴ്ചയിലെ ഏറ്റവും ഉയർന്ന നിരക്കായ 13.64 രൂപയിലെത്തി. 4.59 ശതമാനം നേട്ടത്തില് 13.45 രൂപയിലാണ് ഓഹരി വ്യാപാരം അവസാനിപ്പിച്ചത്. എസ്ബിഐ (SBI) നേതൃത്വം നൽകുന്ന ബാങ്കുകളുടെ കൂട്ടായ്മയുമായി 35,000 കോടി രൂപയുടെ വായ്പാ പാക്കേജിനായി കമ്പനി ചർച്ചകൾ നടത്തിവരികയാണെന്ന് സിഇഒ അഭിജിത്ത് കിഷോർ അറിയിച്ചതാണ് ഈ കുതിപ്പിന് പ്രധാന കാരണം.
നിക്ഷേപവും വായ്പാ വിശദാംശങ്ങളുംപൊതുമേഖലാ, സ്വകാര്യ, വിദേശ ബാങ്കുകൾ ഉൾപ്പെടുന്ന കൺസോർഷ്യത്തിൽ നിന്ന് 25,000 കോടി രൂപയുടെ ഫണ്ടഡ് സൗകര്യവും 10,000 കോടി രൂപയുടെ നോൺ-ഫണ്ടഡ് സൗകര്യവുമാണ് കമ്പനി ലക്ഷ്യമിടുന്നത്.
അടുത്ത മൂന്ന് വർഷത്തിനുള്ളിൽ ശൃംഖലാ വിപുലീകരണത്തിനായി (Network expansion) 45,000 കോടി രൂപയുടെ മൂലധനച്ചെലവ് കമ്പനി ആസൂത്രണം ചെയ്യുന്നു. ഈ വായ്പാ നടപടികൾ വളരെ വേഗത്തിൽ പൂർത്തിയാക്കാൻ സാധിക്കുമെന്നാണ് കമ്പനി നേതൃത്വത്തിന്റെ പ്രത്യാശ. 4G, 5G സേവനങ്ങൾ ശക്തിപ്പെടുത്തി റിലയൻസ് ജിയോ, ഭാരതി എയർടെൽ എന്നിവരുമായി ശക്തമായി മത്സരിക്കാനാണ് ഇതിലൂടെ ലക്ഷ്യമിടുന്നത്.
നാലാം പാദത്തിൽ കമ്പനി 51,970 കോടി രൂപയുടെ അറ്റാദായം രേഖപ്പെടുത്തി. എന്നാൽ ഇത് പ്രവർത്തന ലാഭമല്ലെന്നും എജിആർ (AGR) ബാധ്യതകൾ പുനർനിർണയം ചെയ്തതിലൂടെ ഉണ്ടായ മാറ്റമാണെന്നും (One-time accounting adjustment) സാമ്പത്തിക വിദഗ്ധർ ചൂണ്ടിക്കാട്ടുന്നു.
ഇത് ഒഴിവാക്കിയാൽ ഏകദേശം 5,515 കോടി രൂപയുടെ പ്രവർത്തന നഷ്ടമാണ് കമ്പനി ഈ പാദത്തിൽ രേഖപ്പെടുത്തിയിട്ടുള്ളത്. എങ്കിലും, വായ്പാ സൗകര്യങ്ങളും പ്രൊമോട്ടർമാരിൽ നിന്നുള്ള ഫണ്ട് സമാഹരണവും വഴി ഭാവിയിലെ സാമ്പത്തിക ബാധ്യതകൾ മറികടക്കാൻ സാധിക്കുമെന്നാണ് കമ്പനിയുടെ വിലയിരുത്തൽ.
