മുംബൈ: സഞ്ജയ് ഗുപ്തയെ കമ്പനിയുടെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായി നിയമിച്ച് നാഷണൽ കമ്മോഡിറ്റീസ് മാനേജ്മെന്റ് സർവീസസ് ലിമിറ്റഡ് (എൻസിഎംഎൽ). നിലവിൽ എൻസിഎംഎൽ പ്രസിഡന്റാണ് സഞ്ജയ് ഗുപ്ത. കൂടാതെ സിറാജ് ചൗധരിയെ എൻസിഎംഎൽ ചെയർമാനായി നിയമിച്ചതായി കമ്പനി പ്രസ്താവനയിൽ പറഞ്ഞു.
മൂന്ന് പതിറ്റാണ്ടിലേറെ അനുഭവസമ്പത്തുള്ള പരിചയസമ്പന്നനായ ഒരു ബിസിനസ്സ് നേതാവായ സഞ്ജയ്, ജെകെ അഗ്രിജെനെറ്റിക്സ്, ഗോദ്റെജ് അഗ്രോവെറ്റ് തുടങ്ങിയ സ്ഥാപനങ്ങളിൽ നിരവധി നേതൃത്വപരമായ റോളുകൾ വഹിച്ചിട്ടുണ്ട്. എൻസിഎംഎല്ലിൽ ചേരുന്നതിന് മുമ്പ് സഞ്ജയ് ജെകെ അഗ്രി ജനറ്റിക്സ് ലിമിറ്റഡിന്റെ പ്രസിഡന്റും സിഇഒയുമായിരുന്നു.
മാർക്കറ്റ് ഡെവലപ്മെന്റ്, സെയിൽസ് ആൻഡ് മാർക്കറ്റിംഗ്, സോഴ്സിംഗ്, കമ്മോഡിറ്റി ട്രേഡിംഗ്, ഓപ്പറേഷൻസ്, ചാനൽ മാനേജ്മെന്റ്, പ്രൊഡക്ഷൻ മാനേജ്മെന്റ്, സപ്ലൈ ചെയിൻ മാനേജ്മെന്റ്, ഡിസ്ട്രിബ്യൂഷൻ, ലോജിസ്റ്റിക്സ് തുടങ്ങിയ പ്രവർത്തനങ്ങളിൽ അദ്ദേഹത്തിന് പ്രവർത്തി പരിചയമുണ്ട്. അഹമ്മദാബാദിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റിൽ നിന്ന് പിജിഡിഎം നേടിയ സഞ്ജയ്, കർണാലിലെ എൻഡിആർഐയിൽ നിന്നാണ് ബിരുദം നേടിയത്.
എൻസിഎംഎല്ലിന് നിലവിൽ 28 സംസ്ഥാനങ്ങളിലെ 297 വെയർഹൗസുകളിലായി 1.89 ദശലക്ഷം ടൺ (mt) സംഭരണ ശേഷിയുണ്ട്. ചരക്കുകളുടെ സംഭരണം സുഗമമാക്കുന്നതിന് 22 പ്രാദേശിക ഓഫീസുകൾ, കാർഷിക ഉൽപ്പന്ന വിപണികളിൽ 800-ലധികം ടച്ച് പോയിന്റുകൾ, കർഷകരുടെയും വ്യാപാരികളുടെയും ശൃംഖല എന്നിവ കമ്പനിക്കുണ്ട്. ഏകദേശം 1564 കോടിയുടെ മാനേജ്മെന്റിന് കീഴിലുള്ള ആസ്തിയുള്ള എൻസിഎംഎൽ 28 പങ്കാളി ബാങ്കുകൾക്കും ധനകാര്യ സ്ഥാപനങ്ങൾക്കും ഈട് കാർഷിക ഉൽപ്പന്നങ്ങളുടെ മാനേജ്മെന്റിനായി കസ്റ്റോഡിയൽ സേവനങ്ങൾ വാഗ്ദാനം ചെയ്യുന്നു.
