മുംബൈ: നടപ്പ് സാമ്പത്തിക വർഷത്തിന്റെ സെപ്റ്റംബർ പാദത്തിൽ മഹീന്ദ്ര ആൻഡ് മഹീന്ദ്രയുടെ (എം ആൻഡ് എം) നികുതിയാനന്തര ലാഭം (പിഎടി) 46% ഉയർന്ന് 2,090 കോടി രൂപയായി. വിശകലന വിദ്ഗധരുടെ പ്രവചനങ്ങളെ മറികടന്ന് കൊണ്ടുള്ള പ്രകടനമാണ് കമ്പനി കാഴ്ചവെച്ചത്.
സമാനമായി കമ്പനിയുടെ ത്രൈമാസ വരുമാനം 20,839 കോടി രൂപയായി. ഇത് 57 ശതമാനത്തിന്റെ വർദ്ധനവാണ് രേഖപ്പെടുത്തിയത്. കൂടാതെ ഇത് തങ്ങളുടെ എക്കാലത്തെയും ഉയർന്ന ത്രൈമാസ വരുമാനവുമാണെന്ന് എം ആൻഡ് എം പ്രസ്താവനയിൽ പറഞ്ഞു.
കമ്പനിയുടെ ഇബിഐടിഡിഎ 2,496 കോടി രൂപയായി വർധിച്ചപ്പോൾ ഈ പാദത്തിൽ വിറ്റഴിച്ച മൊത്തം വാഹനങ്ങളുടെ എണ്ണം 75 ശതമാനം വർധിച്ച് 1,74,098 ആയി. അതേസമയം എം ആൻഡ് എമ്മിന്റെ പ്രവർത്തന മാർജിൻ മുൻവർഷത്തെ 12.47 ശതമാനത്തിൽ നിന്ന് 11.98 ശതമാനമായി കുറഞ്ഞു.
പ്രസ്തുത പാദത്തിൽ ഓട്ടോ, ഫാം വിഭാഗങ്ങൾ എക്കാലത്തെയും ഉയർന്ന ത്രൈമാസ വരുമാനം രേഖപ്പെടുത്തിയതായി കമ്പനി അറിയിച്ചു. ശക്തമായ വരുമാന വളർച്ചയും, പ്രവർത്തന മികവും ചെലവ് മാനേജ്മെന്റും തങ്ങളെ എക്കാലത്തെയും ഉയർന്ന ലാഭം രേഖപ്പെടുത്താൻ പ്രാപ്തരാക്കിയതായി മഹീന്ദ്ര സിഎഫ്ഒ മനോജ് ഭട്ട് പറഞ്ഞു.
