മുംബൈ: എസ്ഇപിസിയിൽ (മുമ്പ് ശ്രീറാം ഇപിസി എന്നറിയപ്പെട്ടിരുന്ന) 350 കോടി രൂപ നിക്ഷേപിച്ച് ദുബായ് ആസ്ഥാനമായുള്ള മാർക്ക് എബി ക്യാപിറ്റൽ എൽഎൽസി. റിസർവ് ബാങ്ക് ഓഫ് ഇന്ത്യയുടെ നിഷ്ക്രിയ ആസ്തി പ്രൊവിഷനുകൾക്ക് കീഴിലുള്ള എസ്ഇപിസിയുടെ പുനഃക്രമീകരണത്തിന്റെ ഭാഗമായാണ് നിക്ഷേപം.
ഇതിന്റെ ഫലമായി മാർക്ക് എബി ക്യാപിറ്റൽ എസ്ഇപിസിയുടെ 27 ശതമാനം ഓഹരികൾ സ്വന്തമാക്കി കമ്പനിയുടെ ഒരു പ്രൊമോട്ടറായി മാറും. ഈ പുനഃസംഘടനയുടെ ഭാഗമായി ബാങ്കർമാരുടെ കൺസോർഷ്യം അവരുടെ കടത്തിന്റെ ഒരു ഭാഗം സിസിഡികളും എൻസിഡികളുമാക്കി മാറ്റി.
കൂടാതെ എസ്ഇപിസിയുടെ ബോർഡ് പുനഃസംഘടിപ്പിക്കുകയും മാനേജിംഗ് ഡയറക്ടറായി എൻ കെ സൂര്യനാരായണനെ നിയമിക്കുകയും ചെയ്തു.
മാർക്ക് എബി ക്യാപിറ്റൽ നിക്ഷേപിച്ച 350 കോടി രൂപ എൻസിഡികളാക്കി മാറ്റിയതോടെ എസ്ഇപിസിയുടെ മൊത്തം കടം ഇപ്പോൾ മുൻപത്തെ 880 കോടിയിൽ നിന്ന് 130 കോടിയായി കുറഞ്ഞു. ദുബായ് ആസ്ഥാനമായി പ്രവർത്തിക്കുന്ന ഒരു പ്രമുഖ നിക്ഷേപ കമ്പനി/ ഫാമിലി ഓഫീസാണ് മാർക്ക് എബി ക്യാപിറ്റൽ. കമ്പനിക്ക് മാനേജ്‌മെന്റിന് കീഴിൽ 1 ബില്യൺ ഡോളറിലധികം ആസ്തിയുണ്ട്.
