അദാനി ഗ്രൂപ്പ് കമ്പനികളായ, അദാനി എന്റർപ്രൈസസ്, അദാനി ഗ്രീൻ എനർജി, അദാനി ടോട്ടൽ ഗ്യാസ് തുടങ്ങിയ ഓഹരികൾ അവയുടെ സമീപ കാലത്തെ താഴ്ന്ന നിലവാരത്തിൽ നിന്ന് ഉയരാൻ തുടങ്ങിയിരുന്നു. ഇതോടെ 7 അദാനി ഗ്രൂപ്പ് കമ്പനികളിൽ എൽഐസിക്കുള്ള ഹോൾഡിങ് 40,000 കോടി രൂപ നിലവാരത്തിലെത്തി.
ഫെബ്രുവരി 27ന് ഏഴ് അദാനി ഗ്രൂപ്പ് ഓഹരികളിൽ, എൽഐസിക്കുണ്ടായ നിക്ഷേപം 31,416 കോടി രൂപയായിരുന്നു. ഇതിൽ നിന്നും 27% വർധനയാണ് നിലവിൽ ഉണ്ടായിരിക്കുന്നത്.
എയ്സ് ഇക്വിറ്റിയുടെ ഡാറ്റ പ്രകാരം, അദാനി എന്റർപ്രൈസസ്, അദാനി ഗ്രീൻ എനർജി, അദാനി ടോട്ടൽ ഗ്യാസ്, അദാനി പോർട്സ് & സ്പെഷ്യൽ ഇക്കണോമിക് സോൺ, അദാനി ട്രാൻസ്മിഷൻ എന്നീ അദാനി ഓഹരികളിലും, അടുത്തിടെ അദാനി ഏറ്റെടുത്ത, അംബുജ സിമന്റ്സ്, എസിസി ഓഹരികളിലും ഒരു ശതമാനത്തിൽ കൂടുതൽ ഓഹരി പങ്കാളിത്തമാണ് എൽഐസിക്കുള്ളത്. 2022 ഡിസംബർ 31ലെ ഡാറ്റ പ്രകാരമുള്ള കണക്കുകളാണിത്.
വാല്യു അടിസ്ഥാനത്തിൽ പരിശോധിക്കുമ്പോൾ, ഫെബ്രുവരി 27 ക്ലോസിങ് നിലയിൽ അദാനി ഓഹരികളിൽ, എൽഐസിക്കുണ്ടായിരുന്ന നിക്ഷേപം, മാർച്ച് 27 ക്ലോസിങ് നിലയിൽ എൽഐസി നിക്ഷേപത്തിന്റെ മൂല്യം എന്നിവയാണ് താഴെ നൽകിയിരിക്കുന്നത്.
അദാനി പോർട്സ്: 11,101 കോടി, 12,421 കോടിയായി വർധിച്ചു
അദാനി എന്റർപ്രൈസസ്: 5,750 കോടി, 8,210 കോടിയായി വർധിച്ചു
അദാനി ടോട്ടൽ ഗ്യാസ്: 4,696 കോടി, 6,282 കോടിയായി വർധിച്ചു
അംബുജ സിമന്റ്സ് : 4,141 കോടി, 4,647 കോടിയായി വർധിച്ചു
അദാനി ട്രാൻസ്മിഷൻ : 2,751 കോടി, 4,353 കോടിയായി വർധിച്ചു
അദാനി ഗ്രീൻ എനർജിയിൽ 1.28%, എസിസിയിൽ 6.41% എന്നിങ്ങനെയാണ് എൽഐസിക്ക് നിക്ഷേപമുള്ളത്. മാർച്ച് 27 ക്ലോസിങ് നിലവാരം പരിഗണിക്കുമ്പോൾ ഇവയുടെ മൂല്യം ഏകദേശം 2,000 കോടി രൂപയാണ്.
എല്ലാ അദാനി ഗ്രൂപ്പ് കമ്പനികളിലും കൂടി ആകെ, 40,038 കോടി രൂപയുടെ നിക്ഷേപമാണ് എൽഐസിക്കുള്ളത്. ജനുവരി 24 നിലവാരവുമായി താരതമ്യം ചെയ്യുമ്പോൾ, അദാനി ഓഹരികളിൽ എൽഐസിക്കുള്ള നിക്ഷേപം ആകെ 51% ഇടിവ് നേരിടുന്നുമുണ്ട്.
ഹിൻഡൻബർഗ് റിപ്പോർട്ട് പുറത്തു വന്ന ജനുവരി 24ന് ആകെ 81,268 കോടിയുടെ നിക്ഷേപമാണ് അദാനി ഗ്രൂപ്പ് ഓഹരികളിൽ എൽഐസിക്ക് ഉണ്ടായിരുന്നത്.
