ഇന്ത്യൻ വിപണിയിൽ കിയയുടെ ജനപ്രിയ എംപിവി ശ്രേണിയായ കാരൻസ് കുടുംബം (ഐസിഇ, ഇവി ഉൾപ്പെടെ) 3 ലക്ഷം യൂണിറ്റുകളുടെ വിൽപ്പന പിന്നിട്ട് പുതിയ നാഴികക്കല്ല് സ്വന്തമാക്കി. പെട്രോൾ, ഡീസൽ, ഇലക്ട്രിക് എന്നീ മൂന്ന് പവർട്രെയിൻ ഓപ്ഷനുകളിലായി വിപണിയിലെത്തുന്ന കാരൻസിന് മികച്ച സ്വീകാര്യതയാണ് ലഭിക്കുന്നതെന്ന് കമ്പനി അറിയിച്ചു.
ഏറ്റവും ശ്രദ്ധേയമായ കാര്യം, മൊത്തം വിൽപ്പനയുടെ 60 ശതമാനവും പെട്രോൾ വകഭേദങ്ങളുടേതാണ് എന്നതാണ്.
കിയ പുറത്തുവിട്ട കണക്കുകൾ പ്രകാരം, ഡീസൽ മോഡലുകൾ മൊത്തം വിൽപ്പനയുടെ 30 ശതമാനം പങ്ക് നേടിയപ്പോൾ, ഇലക്ട്രിക് പതിപ്പുകൾക്ക് 10 ശതമാനം വിഹിതമാണ് ലഭിച്ചത്. ഉയർന്ന വേരിയന്റുകളോടുള്ള ഉപഭോക്താക്കളുടെ താൽപര്യവും ശ്രദ്ധേയമാണ്. ആകെ വിൽപ്പനയുടെ 18 ശതമാനവും ടോപ്പ് വേരിയന്റുകളാണ്.
നേട്ടത്തെക്കുറിച്ച് പ്രതികരിച്ച കിയ ഇന്ത്യയുടെ ചീഫ് സെയിൽസ് ഓഫീസർ സൺഹാക്ക് പാർക്ക്, കാരൻസിന്റെ 3 ലക്ഷം യൂണിറ്റ് വിൽപ്പന എംപിവി വിഭാഗത്തിൽ വാഹനത്തിന്റെ ശക്തമായ സാന്നിധ്യവും ഉപഭോക്താക്കളുടെ വിശ്വാസവും വ്യക്തമാക്കുന്നതാണെന്ന് പറഞ്ഞു. ഉപഭോക്തൃ ആവശ്യങ്ങൾ കൃത്യമായി മനസ്സിലാക്കി ഗുണനിലവാരത്തിൽ വിട്ടുവീഴ്ച ചെയ്യാത്ത ഉൽപ്പന്ന തന്ത്രമാണ് ഈ വിജയത്തിന് പിന്നിലെ പ്രധാന കാരണമെന്നും അദ്ദേഹം കൂട്ടിച്ചേർത്തു.
അതേസമയം, കിയയുടെ ഇലക്ട്രിക് നിരയിലെ പുതിയ മോഡലായ കാരൻസ് ക്ലാവിസ് ഇവി ആറ് സീറ്ററും ഏഴ് സീറ്ററുമായ കോൺഫിഗറേഷനുകളിൽ ലഭ്യമാണ്. 99 കിലോവാട്ടും 126 കിലോവാട്ടും ശേഷിയുള്ള രണ്ട് ഇലക്ട്രിക് മോട്ടോർ ഓപ്ഷനുകളാണ് വാഹനത്തിനുള്ളത്.
രണ്ടിലും 255 എൻഎം ടോർക്ക് ലഭിക്കും. 42 കിലോവാട്ട്-മണിക്കൂർ ബാറ്ററിയിൽ 404 കിലോമീറ്ററും 51.4 കിലോവാട്ട്-മണിക്കൂർ ബാറ്ററിയിൽ 490 കിലോമീറ്ററും വരെ സഞ്ചാരപരിധി കമ്പനി അവകാശപ്പെടുന്നു. ഫാസ്റ്റ് ചാർജറിലൂടെ വെറും 39 മിനിറ്റിനുള്ളിൽ 10 ശതമാനത്തിൽ നിന്ന് 80 ശതമാനം വരെ ബാറ്ററി ചാർജ് ചെയ്യാനും സാധിക്കും.
ഐസിഇ പതിപ്പായ കാരൻസ് ക്ലാവിസിൽ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ (115 ബിഎച്ച്പി), 1.5 ലിറ്റർ ടർബോ പെട്രോൾ (160 ബിഎച്ച്പി), 1.5 ലിറ്റർ ഡീസൽ (116 ബിഎച്ച്പി) എന്നീ മൂന്ന് എൻജിൻ ഓപ്ഷനുകളാണ് ലഭ്യമാകുന്നത്. കമ്പനി അവകാശപ്പെടുന്ന ഇന്ധനക്ഷമത പ്രകാരം, നാച്ചുറലി ആസ്പിറേറ്റഡ് പെട്രോൾ പതിപ്പിന് ലിറ്ററിന് 15.34 കിലോമീറ്ററും ടർബോ പെട്രോൾ പതിപ്പിന് ലിറ്ററിന് 16.66 കിലോമീറ്ററും ഡീസൽ പതിപ്പിന് ലിറ്ററിന് 19.4 കിലോമീറ്ററും മൈലേജ് ലഭിക്കും.
ഫീച്ചറുകളുടെ കാര്യത്തിലും കാരൻസ് ക്ലാവിസ് സമ്പന്നമാണ്. 12.3 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സംവിധാനം, 12.3 ഇഞ്ച് പൂർണ ഡിജിറ്റൽ ഇൻസ്ട്രുമെന്റ് ക്ലസ്റ്റർ, വായു ശുദ്ധീകരണ സംവിധാനം, വെന്റിലേറ്റഡ് മുൻസീറ്റുകൾ, പനോരമിക് സൺറൂഫ്, 64 നിറങ്ങളിലുള്ള ആംബിയന്റ് ലൈറ്റിങ്, എട്ട് സ്പീക്കറുകളുള്ള ബോസ് സൗണ്ട് സിസ്റ്റം, 360 ഡിഗ്രി ക്യാമറ, ബ്ലൈൻഡ് സ്പോട്ട് മോണിറ്റർ, ലെവൽ 2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം (എഡിഎഎസ്) തുടങ്ങിയ നിരവധി പ്രീമിയം സവിശേഷതകളാണ് വാഹനത്തിലുള്ളത്.
