കേരള ഫിനാൻഷ്യൽ കോർപ്പറേഷന്റെ (കെഎഫ്സി) മുൻനിര പദ്ധതിയായ മുഖ്യമന്ത്രിയുടെ സംരംഭകത്വ വികസന പരിപാടിയിലെ (CMEDP) വായ്പകളുടെ പരിധി അഞ്ച് കോടി രൂപയായി ഉയർത്തി. സംസ്ഥാന ബജറ്റിലെ പ്രഖ്യാപനത്തിന് പിന്നാലെയാണ് വായ്പാ പരിധി നിലവിലെ 2 കോടി രൂപയിൽ നിന്ന് 5 കോടി രൂപയായി വർദ്ധിപ്പിച്ചത്. ചെറുകിട, ഇടത്തരം സംരംഭകർക്ക് കൂടുതൽ വലിയ സംരംഭങ്ങൾ ആരംഭിക്കുന്നതിനും നിലവിലുള്ളവ വിപുലീകരിക്കുന്നതിനും ഈ തീരുമാനം സഹായകരമാകും. ഈ പദ്ധതി പ്രകാരമുള്ള വായ്പകളുടെ വാർഷിക പലിശ നിരക്ക് 6 ശതമാനമാണ്. കൂടുതൽ പേർക്ക് സംരംഭകത്വ മേഖലയിലേക്ക് കടന്നുവരാൻ അവസരമൊരുക്കിക്കൊണ്ട് അപേക്ഷകരുടെ ഉയർന്ന പ്രായപരിധി 50-ൽ നിന്നും 60 വയസ്സായി വർദ്ധിപ്പിച്ചു. പുതിയ മാറ്റങ്ങളോടെയുള്ള വായ്പാ വിതരണം ഉടൻ ആരംഭിക്കുമെന്ന് കെഎഫ്സി അറിയിച്ചിട്ടുണ്ട്.
