തിരുവനന്തപുരം: രാജ്യത്തെ പ്രമുഖ ടെലികോം കമ്പനിയായ റിലയൻസ് ജിയോ കുടുംബശ്രീയുമായി കൈകോർക്കാനൊരുങ്ങുന്നു. 10,000 വനിതകൾക്ക് തൊഴിൽ നൽകുന്ന പദ്ധതിയാണ് ഈ കൂട്ടുകെട്ടിലൂടെ സംസ്ഥാനത്ത് ആരംഭിക്കുകയെന്ന് മന്ത്രി എംബി രാജേഷ് പറഞ്ഞു. തൊഴിൽ കാംപെയ്നിന്‍റെ ഭാഗമായി കുടുംബശ്രീയും റിലയൻസുമായി നടത്തിയ ചർച്ചയുടെ അടിസ്ഥാനത്തിലാണ് ആദ്യ ഘട്ടത്തിൽ 10,000 വനിതകൾക്ക് തൊഴിൽ ലഭ്യമാക്കാൻ തീരുമാനമായത്. ഡിജിറ്റൽ ഉത്പന്നങ്ങളുടെ വിപണനവും, വർക്ക് ഫ്രം ഹോമായി കസ്റ്റമർ കെയർ ടെലി കോളിംഗും ഉൾപ്പെടെയുള്ള തൊഴിലുകളിലേക്കാണ് കുടുംബശ്രീ വനിതകളെ പരിഗണിക്കുക. പദ്ധതിയുടെ ആദ്യ ഘട്ടത്തിൽ റിലയൻസ് ടെലികോം ഡിവിഷനായ ജിയോയുടെ വിവിധ വിഭാഗങ്ങളിൽ നിന്നു ലഭ്യമാകുന്ന ഡിജിറ്റൽ ഉത്പന്നങ്ങളുടെ വിപണനവും മറ്റ് ഡിജിറ്റൽ സേവനങ്ങളും നൽകുന്നതിനാണ് കുടുംബശ്രീ വനിതകളുടെ സേവനം പ്രയോജനപ്പെടുത്തുക.
തൊഴിലിനായി തിരഞ്ഞെടുക്കപ്പെടുന്നവർക്ക് ആവശ്യമായ പരിശീലനങ്ങൾ റിലയൻസ് നൽകും. ആകർഷകമായ വേതനവും ലഭ്യമാക്കുമെന്നും കമ്പനി അറിയിച്ചു. ഇതിനായി കുടുംബശ്രീയും റിലയൻസ് പ്രോജക്ട്സ് ആൻഡ് പ്രോപ്പർട്ടി മാനേജ്മെന്റ് സർവീസസ് ലിമിറ്റഡും തമ്മിൽ ധാരണാ പത്രത്തിൽ ഒപ്പിട്ടു. തൊഴിലവസരങ്ങളുടെ എണ്ണത്തിന് അനുസൃതമായി യോഗ്യരായ കുടുംബശ്രീ വനിതകളുടെ പട്ടിക അതത് കുടുംബശ്രീ സിഡിഎസുകൾ വഴി റിലയൻസിന് ലഭ്യമാക്കും. ഫ്രീലാൻസ് മാതൃകയിലായിരിക്കും ഇവരുടെ ജോലി. ചെയ്യുന്ന ജോലിക്ക് അനുസൃതമായായിരിക്കും വേതനം ലഭിക്കുക. നിലവിൽ ഈ രംഗത്ത് തൊഴിൽ ചെയ്യുന്നവർക്ക് പ്രതിമാസം 15000 രൂപയിലേറെയാണ് ജിയോ വരുമാനം നൽകുന്നത്. പദ്ധതിയുടെ ആദ്യ ഘട്ടത്തിൽ ജിയോ കസ്റ്റമർ അസോസിയേറ്റ്സിന്റെ കീഴിൽ ടെലികോളിംഗ് മേഖലയിൽ 300 പേർക്ക് വർക്ക് ഫ്രം ഹോം ജോലിയും നൽകുന്നുണ്ട്. പുറത്ത് പോയി ജോലി ചെയ്യാൻ താത്പര്യമില്ലാത്ത വീട്ടമ്മമാരായ കുടുംബശ്രീ വനിതകൾക്കിത് ഏറെ സഹായകമാകും.
