ലണ്ടൻ: ഹിന്ദുജ ഗ്രൂപ്പിന്റെ ചെയർമാൻ ഗോപിചന്ദ് പി ഹിന്ദുജ (85) അന്തരിച്ചു. ലണ്ടനിൽ വച്ചായിരുന്നു അന്ത്യം. ബ്രിട്ടനിലെ ഏറ്റവും സമ്പന്നനായ ബിസിനസ്സുകാരിൽ ഒരാളായിരുന്ന ഗോപിചന്ദ്, ‘ജി പി’ എന്ന പേരിലാണ് അറിയപ്പെട്ടിരുന്നത്.
ശാരീരിക ബുദ്ധിമുട്ടുകളെ തുടർന്ന് കുറച്ചു ദിവസങ്ങളായി ലണ്ടനിലെ ആശുപതിയിൽ ചികിത്സയിലായിരുന്നു. ഇന്ത്യൻ കോർപറേറ്റ് ലോകത്ത് മുൻനിരയിൽ നിൽക്കുന്ന ഹിന്ദുജ ഗ്രൂപ്പിന്റെ നേതൃത്വം 2023 മെയ് മുതലാണ് ജി പി ഏറ്റെടുക്കുന്നത്. അദ്ദേഹത്തിന്റെ മൂത്ത സഹോദരൻ ശ്രീചന്ദ് ഹിന്ദുജയുടെ മരണശേഷമാണ് പദവിയിലെത്തിയത്.
ഈ വർഷം ആദ്യം, ദി സൺഡേ ടൈംസ് റിച്ച് ലിസ്റ്റ് ഗോപി ഹിന്ദുജയെയും കുടുംബത്തെയും ബ്രിട്ടനിലെ ഏറ്റവും ധനികരായി തിരഞ്ഞെടുത്തിരുന്നു. തുടർച്ചയായ രണ്ടാം തവണയാണ് ഈ പദവി ജി പി അലങ്കരിക്കുന്നത്. 35.3 ബില്യൺ പൗണ്ടാണ് ആസ്തി.
ഇന്ത്യ സ്വാതന്ത്ര്യം നേടുന്നതിന് മുൻപ് തന്നെ അടിത്തറ പാകിയ ഹിന്ദുജ ഗ്രൂപ്പ് കുടുംബത്തിൽ ജനിച്ച ഗോപിചന്ദ് ഹിന്ദുജ 1959 മുതലാണ് ഫാമിലി ബിസിനസിൽ സജീവമാകുന്നത്. ബാങ്കിങ്, ഫിനാൻസ്, ഓട്ടോ മോട്ടീവ്, മീഡിയ ഇൻഫ്രാസ്ട്രച്ചർ തുടങ്ങിയ എല്ലാ മേഖലയിലേക്കും ബിസിനസ് വ്യാപിപ്പിക്കാൻ ഹിന്ദുജ ഗ്രൂപ്പിന് നിർണായകമായ സംഭാവനയാണ് ജി പി നൽകിയത്. ഇൻഡോ മിഡിൽ ഈസ്റ്റ് പ്രവർത്തനങ്ങളിൽ ഒതുങ്ങി നിൽക്കാതെ ആഗോള തലത്തിലേക്ക് ബിസിനസ് വളർത്തിയെടുക്കാൻ അദ്ദേഹത്തിന് സാധിച്ചിട്ടുണ്ട്.
ജിപിയുടെ നേതൃത്വത്തിലാണ് 1984 ൽ, ഗൾഫ് ഓയിൽ എന്ന കമ്പനി ഏറ്റെടുക്കുന്നത്. മൂന്ന് വർഷങ്ങൾക്ക് ശേഷം 1987 ൽ എൻ ആർ ഐ നിക്ഷേപം ഉറപ്പാക്കി അശോക് ലെയ്ലാൻഡ് ഏറ്റെടുത്തു.
മുംബൈയിൽ ജയ് ഹിന്ദ് കോളേജിൽനിന്ന് ബിരുദം പൂർത്തിയാക്കിയ ജി പി ബിസിനസ് രംഗത്തെ സംഭാവനകൾക്ക് വെസ്റ്റ്മിൻസ്റ്റർ സർവകലാശാലയിൽനിന്ന് നിയമത്തിൽ ഓണററി ഡോക്ടറേറ്റും ലണ്ടനിലെ റിച്ച്മണ്ട് കോളേജിൽ നിന്ന് സാമ്പത്തിക ശാസ്ത്രത്തിൽ ഓണററി ഡോക്ടറേറ്റും നേടിയിട്ടുണ്ട്.
1919 ലാണ് ഹിന്ദുജ ഗ്രൂപ്പ് സ്ഥപിതമായത്. പർമാനന്ദ് ദീപ്ചന്ദ് ഹിന്ദുജയായിരുന്നു കമ്പനിയുടെ സ്ഥാപകൻ. ഇറാനിലായിരുന്നു കമ്പനി സ്ഥാപിച്ചത്. തുടർന്ന് 1979 ലാണ് കമ്പനി ലണ്ടനിലേക്ക് മാറ്റുന്നത്. മുംബൈ ആസ്ഥാനമായി പ്രവർത്തിക്കുന്ന കമ്പനിക്ക് ലോകത്താകമാനം 200000 ജീവനക്കാരാണ് പ്രവർത്തിക്കുന്നത്.
റിയൽ എസ്റ്റേറ്റ് മേഖലയിൽ പ്രാവീണ്യം നേടാൻ ഗ്രൂപ്പിന് സാധിച്ചിട്ടുണ്ട്. നിലവിൽ റാഫിൽ ലണ്ടൻ ഹോട്ടൽ ആയി പുനർ നിർമാണം ചെയ്ത ഓൾഡ് വാർ ഓഫീസ്സ് ബിൽഡിംഗ് ഹിന്ദുത്വ ഗ്രൂപ്പാണ് നിർമിച്ചത്. ബക്കിംഗ്ഹാം കൊട്ടാരത്തിനടുത്തുള്ള കാൾട്ടൺ ഹൗസ് ടെറസും അവരുടെ സംഭാവനയായിരുന്നു.
ഗോപിചന്ദ് ലണ്ടനിൽ സ്ഥിര താമസമാക്കിയതിനാൽ അദ്ദേഹത്തിന്റെ സഹോദരങ്ങളായ അശോക്, പ്രകാശ് എന്നിവരാണ് മുംബൈയിലെ ബിസിനസ് കൈകാര്യം ചെയുന്നത്. ബിസിനസിലും, ജീവകാരുണ്യ പ്രവർത്തനങ്ങളിലും ഒരു പോലെ സജീവമായി പ്രവർത്തിക്കാൻ ജി പിക്ക് സാധിച്ചിരുന്നു.
ഇന്ത്യയിലും, യു കെയിലുമായി വ്യാപിച്ചു കിടക്കുന്ന ബിസിനസ് സാമ്രാജ്യത്തിന് അദ്ദേഹത്തിന്റെ വിയോഗം തീരാ നഷ്ടമാണ്. ഭാര്യ സുനിത. സഞ്ജയ് , ധീരജ് , റിത എന്നിവരാണ് മക്കൾ.
