തിരുവനന്തപുരം: ദക്ഷിണേന്ത്യയിലെ പ്രശസ്ത ട്രാവല്-ട്രേഡ് എക്സ്പോയായ ഗ്ലോബല് ട്രാവല് മാര്ക്കറ്റിന്റെ (ജിടിഎം-2026) രണ്ടാം പതിപ്പ് ഇന്ന് വൈകിട്ട് 6 ന് കോവളം ഉദയസമുദ്ര ഹോട്ടലില് ടൂറിസം സാംസ്കാരിക മന്ത്രി പിസി വിഷ്ണുനാഥ് ഉദ്ഘാടനം ചെയ്യും.
സംസ്ഥാനത്ത് പുതിയ സര്ക്കാര് അധികാരമേറ്റതിനു ശേഷം ടൂറിസം മേഖലയിലെ പ്രമുഖരും പങ്കാളികളും ഉദ്യോഗസ്ഥരും ഒത്തുചേരുന്ന ആദ്യത്തെ സമ്മേളനമാണിത്. ദക്ഷിണ കേരളത്തിലെ പ്രധാന വിനോദസഞ്ചാര കേന്ദ്രങ്ങളെ കൂട്ടി യോജിപ്പിച്ചുകൊണ്ടുള്ള വ്യത്യസ്ത ടൂറിസം സര്ക്യൂട്ടുകള് ജിടിഎമ്മില് അവതരിപ്പിക്കും.
ഉദ്ഘാടന സമ്മേളനത്തില് ഗതാഗത മന്ത്രി സിപി ജോണ്, ശ്രീലങ്കന് ടൂറിസം സഹമന്ത്രി പ്രൊഫ. റുവാന് രണസിംഗെ, ആന്ധ്രാപ്രദേശ് ടൂറിസം സാംസ്കാരിക മന്ത്രി കന്ദുല ദുര്ഗേഷ് എന്നിവര് വിശിഷ്ടാതിഥികളായിരിക്കും. എം. വിന്സെന്റ് എംഎല്എ അധ്യക്ഷത വഹിക്കും. കേന്ദ്ര ടൂറിസം അഡീഷണല് സെക്രട്ടറിയും ഡയറക്ടര് ജനറലുമായ സുമന് ബില്ല മുഖ്യപ്രഭാഷണം നടത്തും.
ജിടിഎമ്മിന്റെ ഭാഗമായുള്ള ഗ്ലോബല് ട്രാവല് മാര്ട്ട് എക്സ്പോ ജൂണ് നാലിന് രാവിലെ 10 ന് അമരവിള ഗോള്ഡന് പാലസ് ഇന്റര്നാഷണല് കണ്വെന്ഷന് സെന്ററില് ആരംഭിക്കും.
സൗത്ത് കേരള ഹോട്ടലിയേഴ്സ് ഫോറം (എസ്കെഎച്ച്എഫ്), ട്രിവാന്ഡ്രം ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രി (ടിസിസിഐ), തവസ് വെഞ്ച്വേഴ്സ്, മെട്രോ മാര്ട്ട് എന്നിവയുടെ സംയുക്ത ആഭിമുഖ്യത്തില് കേരള ടൂറിസത്തിന്റെയും ഇന്ത്യ ടൂറിസത്തിന്റെയും സഹകരണത്തോടെയാണ് ജിടിഎം-2026 സംഘടിപ്പിക്കുന്നത്.
തിരുവനന്തപുരത്തെ വിവിധ വേദികളിലായി സംഘടിപ്പിക്കുന്ന ജിടിഎം എക്സിബിറ്റേഴ്സിനും ബയേഴ്സിനും ആഗോള ട്രാവല്-ടൂറിസം വ്യവസായത്തിലെ പ്രമുഖരുമായി ബിസിനസ് പങ്കാളിത്തം കെട്ടിപ്പടുക്കുന്നതിന് അവസരമൊരുക്കും.
എക്സ്പോയിലേക്ക് ജൂണ് 5 ന് പൊതുജനങ്ങള്ക്ക് പ്രവേശനം അനുവദിക്കും. കൂടുതല് വിവരങ്ങള്ക്ക്: www.gtmt.in, 9995139933, ഇമെയില്: info@gtmt.in.
