ആഗോള വ്യോമയാന മേഖലയെ അമ്പരപ്പിച്ചുകൊണ്ട് നാസയുടെ അത്യാധുനിക എക്സ്-59 ജെറ്റ് വിമാനം ആദ്യ സൂപ്പർസോണിക് പരീക്ഷണം വിജയകരമായി പൂർത്തിയാക്കി. ശബ്ദത്തിന്റെ വേഗം മറികടന്ന് ചരിത്രം കുറിച്ച ഈ സുപ്രധാന നേട്ടം ജൂൺ 5 വെള്ളിയാഴ്ചയാണ് കൈവരിച്ചത്.
ആദ്യ പറക്കൽ നടത്തി ആറ് മാസങ്ങൾക്ക് ശേഷമാണ് ശാസ്ത്ര ലോകം കാത്തിരുന്ന ഈ വൻ കുതിച്ചുചാട്ടം. വാണിജ്യ വ്യോമയാന രംഗത്ത് വൻ മാറ്റങ്ങൾക്ക് വഴിതുറക്കാൻ കെൽപ്പുള്ള ‘ക്വയറ്റ് സൂപ്പർസോണിക്’ (ശബ്ദമില്ലാത്ത അതിവേഗ പറക്കൽ) സാങ്കേതികവിദ്യ വികസിപ്പിക്കുന്നതിനായാണ് നാസ എക്സ്-59 ഡിസൈൻ ചെയ്തിരിക്കുന്നത്.
‘ശാസ്ത്രം, എൻജിനീയറിങ്, എയ്റോസ്പേസ് ഇന്നൊവേഷൻ എന്നിവയിൽ അമേരിക്കയുടെ നിലയ്ക്കാത്ത പ്രവർത്തനത്തിന്റെ തെളിവാണ് എക്സ്-59ന്റെ ഈ ആദ്യ സൂപ്പർസോണിക് പറക്കൽ,’ എന്നാണ് യുഎസ് ഓഫിസ് ഓഫ് സയൻസ് ആൻഡ് ടെക്നോളജി പോളിസി ഡയറക്ടർ മൈക്കൽ ക്രാറ്റ്സിയോസ് പറഞ്ഞത്.
ഇത് ചരിത്ര നിമിഷം
കലിഫോർണിയയിലെ പ്രശസ്തമായ എഡ്വേർഡ്സ് എയർഫോഴ്സ് ബേസിൽ നിന്നാണ് എക്സ്-59 ചരിത്രത്തിലേക്കുള്ള യാത്ര ആരംഭിച്ചത്. നാസയുടെ പ്രമുഖ ടെസ്റ്റ് പൈലറ്റായ ജിം ‘ക്ലൂ’ ലെസ്സ് ആയിരുന്നു വിമാനം നിയന്ത്രിച്ചത്. കലിഫോർണിയ പ്രാദേശിക സമയം രാവിലെ 11.08ന് വിമാനം ടേക്ക് ഓഫ് ചെയ്തു. ആകെ 81 മിനിറ്റ് നീണ്ടുനിന്ന പരീക്ഷണ പറക്കലിനൊടുവിൽ വിമാനം സുരക്ഷിതമായി എഡ്വേർഡ്സ് ബേസിൽ തന്നെ തിരിച്ചിറങ്ങി.
ശബ്ദത്തിന്റെ വേഗം അന്തരീക്ഷ താപനിലയ്ക്കനുസരിച്ച് വ്യത്യാസപ്പെടാറുണ്ട്. ചൂടുള്ള വായുവിൽ ശബ്ദതരംഗങ്ങൾ കൂടുതൽ വേഗത്തിൽ സഞ്ചരിക്കുന്നു. സമുദ്രനിരപ്പിൽ സാധാരണ താപനിലയിൽ മാക് 1 എന്നത് മണിക്കൂറിൽ 761 മൈൽ (1,225 കി.മീ) ആണ്. എന്നാൽ ഉയർന്ന അന്തരീക്ഷത്തിൽ കുറഞ്ഞ താപനിലയിൽ മണിക്കൂറിൽ 713 മൈൽ വേഗം കൈവരിച്ചതോടെ വിമാനം വിജയകരമായി മാക് 1.1 എന്ന സൂപ്പർസോണിക് വേഗത്തിലേക്ക് പ്രവേശിക്കുകയായിരുന്നു.
ഇനി ലക്ഷ്യം ‘1.4 മാക്’
ഈ ചരിത്ര വിജയത്തിൽ മാത്രം ഒതുങ്ങിനിൽക്കാൻ നാസയുടെ ശാസ്ത്രജ്ഞർ തയാറല്ല. വരും ദിവസങ്ങളിൽ തന്നെ വിമാനത്തിന്റെ ശേഷി കൂടുതൽ പരിശോധിക്കുന്നതിനായുള്ള അടുത്ത ഘട്ട പരീക്ഷണങ്ങളിലേക്ക് സംഘം കടക്കും. ‘മിഷൻ കണ്ടീഷൻസ്’ എന്ന് പേരിട്ടിരിക്കുന്ന അടുത്ത പറക്കലിൽ വിമാനത്തെ 55,000 അടി ഉയരത്തിലേക്കും മാക് 1.4 വേഗത്തിലേക്കും എത്തിക്കാനാണ് നാസ പദ്ധതിയിടുന്നത്.
ഭാവിയിൽ യുഎസിലെ വിവിധ ജനവാസ മേഖലകൾക്ക് മുകളിലൂടെ ഈ വിമാനം പറത്തുമ്പോൾ ഉണ്ടാകുന്ന ശബ്ദ വ്യതിയാനങ്ങളെക്കുറിച്ച് പഠിക്കുന്നതിനുള്ള അടിസ്ഥാന മാനദണ്ഡമായാണ് ഈ വേഗവും ഉയരവും നിശ്ചയിച്ചിരിക്കുന്നത്. വിമാനം ശബ്ദവേഗം മറികടക്കുമ്പോൾ ഉണ്ടാകുന്ന ചെറിയ ‘തമ്പ്’ (നേരിയ ശബ്ദം) ജനങ്ങൾ എങ്ങനെ ഉൾക്കൊള്ളുന്നു എന്നതിനെക്കുറിച്ചുള്ള നിർണായക വിവരങ്ങൾ ശേഖരിക്കാൻ ഇതിലൂടെ സാധിക്കും.
എന്തുകൊണ്ട് എക്സ്-59 വ്യോമയാന രംഗത്ത് വിപ്ലവമാകുന്നു?
1973ൽ അമേരിക്കയിലെ ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ) ജനവാസ മേഖലകൾക്ക് മുകളിലൂടെയുള്ള സൂപ്പർസോണിക് വാണിജ്യ വിമാന സർവീസുകൾ പൂർണമായി നിരോധിച്ചിരുന്നു. വിമാനങ്ങൾ ശബ്ദവേഗം മറികടക്കുമ്പോൾ ഉണ്ടാകുന്ന അതിശക്തമായ ‘സോണിക് ബൂം’ (ഇടിമിന്നൽ പോലെയുള്ള വൻ ശബ്ദം) ജനങ്ങൾക്കും കെട്ടിടങ്ങൾക്കും വലിയ നാശനഷ്ടങ്ങളും ബുദ്ധിമുട്ടുകളും ഉണ്ടാക്കിയതിനെ തുടർന്നായിരുന്നു ഈ കടുത്ത തീരുമാനം.
ഇതോടെയാണ് ഭൂമിക്ക് മുകളിലൂടെയുള്ള അതിവേഗ വിമാന സർവീസുകൾ നിർത്തിവച്ചത്.
എന്നാൽ നാസയുടെ ക്വസ്റ്റ് പ്രോഗ്രാമിന്റെ പ്രധാന ഭാഗമായ എക്സ്-59 ഈ പ്രതിസന്ധിക്ക് ശാശ്വത പരിഹാരമാകും. ഇതിന്റെ സവിശേഷമായ നീളമേറിയ നോസും എയ്റോഡൈനാമിക് ഡിസൈനും സോണിക് ബൂമിന്റെ ഭീകര ശബ്ദത്തെ വെറും ഒരു സാധാരണ ‘തമ്പ്’ മാത്രമായി കുറയ്ക്കുന്നു.
ഈ പരീക്ഷണങ്ങളിൽ നിന്ന് ലഭിക്കുന്ന ശാസ്ത്രീയ വിവരങ്ങൾ നാസ രാജ്യാന്തര നിയന്ത്രണ ഏജൻസികൾക്ക് കൈമാറും. ശബ്ദ മാനദണ്ഡങ്ങളിൽ കാലോചിതമായ മാറ്റങ്ങൾ വരുത്താനും, അതുവഴി ഭൂമിക്ക് മുകളിലൂടെയുള്ള സൂപ്പർസോണിക് വാണിജ്യ വിമാന സർവീസുകൾക്ക് വീണ്ടും അനുമതി നേടാനും ഈ ഡേറ്റ സഹായിക്കുമെന്ന് നാസ പ്രത്യാശ പ്രകടിപ്പിച്ചു.
ലോക്ഹീഡ് മാർട്ടിന്റെ ‘സ്കങ്ക് വർക്സ്’ മികവ്
പ്രശസ്ത പ്രതിരോധ-വ്യോമയാന കമ്പനിയായ ലോക്ഹീഡ് മാർട്ടിന്റെ രഹസ്യ ഗവേഷണ വിഭാഗമായ ‘സ്കങ്ക് വർക്സ്’ ആണ് നാസയ്ക്ക് വേണ്ടി എക്സ്-59 നിർമിച്ചത്. കഴിഞ്ഞ ഏതാനും മാസങ്ങളായി ഈ വിമാനം നിരന്തരമായ പരീക്ഷണ പറക്കലുകളിലായിരുന്നു. ‘2025 ഒക്ടോബർ 28ന് നടന്ന വിമാനത്തിന്റെ ആദ്യ പറക്കലിന് ശേഷം ടീം മികച്ച പുരോഗതിയാണ് കൈവരിച്ചത്.
കഴിഞ്ഞ 90 ദിവസത്തിനുള്ളിൽ മാത്രം 16 തവണയാണ് വിമാനം വിജയകരമായി പറന്നത്. ഈ നാഴികക്കല്ലിലേക്ക് ഞങ്ങളെ എത്തിച്ച നാസയിലെയും ലോക്ഹീഡ് മാർട്ടിനിലെയും ടീമിനോട് ഞാൻ നന്ദി പറയുന്നു. നാസയുടെ എക്സ്-പ്ലെയിൻ പോർട്ട്ഫോളിയോ പുനർനിർമിക്കുന്നതിലെ ആദ്യത്തെ വലിയ ചുവടുവെപ്പാകട്ടെ ഇത്,’ എന്ന് നാസ അഡ്മിനിസ്ട്രേറ്റർ ജാരെഡ് ഐസക്മാൻ പറഞ്ഞു.
എക്സ്-59ന്റെ ഈ കുതിച്ചുചാട്ടം ഭാവിയിൽ ലണ്ടനിൽ നിന്ന് ന്യൂയോർക്കിലേക്കും, ടോക്കിയോയിൽ നിന്ന് ലൊസാഞ്ചലസിലേക്കുമുള്ള യാത്രാസമയം പകുതിയായി കുറയ്ക്കാൻ സഹായിക്കുന്ന സൂപ്പർസോണിക് യാത്രാവിമാനങ്ങളുടെ തിരിച്ചുവരവിന് ശക്തമായ അടിത്തറ പാകിയിരിക്കുകയാണ്.
വരും വർഷങ്ങളിൽ വ്യോമയാന മേഖല സാക്ഷ്യം വഹിക്കാൻ പോകുന്നത് വലിയൊരു നിശബ്ദ വിപ്ലവത്തിനാണെന്ന് ഈ വിജയം അടിവരയിടുന്നു.
