പ്രമുഖ ഇരുചക്രവാഹന ബ്രാൻഡായ റോയൽ എൻഫീൽഡിന്റെ മാതൃകമ്പനിയായ ഐഷർ മോട്ടോഴ്സ് (Eicher Motors), 2026 മാർച്ച് പാദഫലങ്ങൾ പ്രഖ്യാപിച്ചു. ഓഹരിയൊന്നിന് കമ്പനി 82 രൂപ ലാഭവിഹിതവും പ്രഖ്യാപിച്ചിട്ടുണ്ട്. 2026 മാർച്ച് പാദത്തിൽ ഇയർ ഓൺ ഇയർ അടിസ്ഥാനത്തിൽ കമ്പനിയുടെ അറ്റാദായം 1,362 കോടി രൂപയിൽ നിന്ന് 12% ഉയർന്ന് 1,520 കോടി രൂപയായി മാറി.
കമ്പനിയുടെ സബ് ബ്രാൻഡായ റോയൽ എൻഫീൽഡ് റെക്കോർഡ് വില്പന നടത്തിയത് പ്രധാനമായും നേട്ടമായി മാറി.
സമാന കാലയളവിൽ ഐഷർ മോട്ടോഴ്സിന്റെ പ്രവർത്തന വരുമാനം 5,150 കോടി രൂപയിൽ നിന്ന് 15.7% വളർച്ചയോടെ 5,961 കോടി രൂപയിലെത്തി. കമ്പനിയുടെ EBITDA (Earnings Before Interest, Taxes, Depreciation, and Amortization) ഇക്കാലയളവിൽ 20% വർധനയോടെ 1,515 കോടി രൂപയിലെത്തി.
റോയൽ എൻഫീൽഡിന്റെ കരുത്ത്
2026 മാർച്ച് പാദത്തിൽ റോയൽ എൻഫീൽഡ് മോട്ടോർ ബൈക്കുകൾക്കുണ്ടായ റെക്കോർഡ് വില്പന ഐഷർ മോട്ടോഴ്സിന്റെ പാദഫലത്തെ പോസിറ്റീവായി സ്വീകരിച്ചു. നാലാം പാദത്തിൽ മാത്രം 3,13,811 യൂണിറ്റുകളുടെ വില്പനയാണ് നടന്നത്. ഇത് ഇയർ-ഓൺ-ഇയർ അടിസ്ഥാനത്തിൽ 12% വളർച്ചയാണ്.
2025-26 സാമ്പത്തിക വർഷം മുഴുവനായി പരിഗണിക്കുമ്പോഴും റോയൽ എൻഫീൽഡിന്റേത് ചരിത്രത്തിലെ ഏറ്റവും ഉയർന്ന വാർഷിക വില്പനയാണ്. ആകെ 1.2 ദശലക്ഷം യൂണിറ്റുകളാണ് കഴിഞ്ഞ സാമ്പത്തിക വർഷത്തിൽ കമ്പനി വില്പന നടത്തിയത്. സബ് 350 മോട്ടോർ സൈക്കിൾ സെഗ്മിന്റിലാണ് കൂടുതൽ ഡിമാൻഡ് ഉണ്ടായത്. മിഡ് സെഗ്മെന്റ് ബൈക്ക് വിപണിയിലെ മാർക്കറ്റ് ലീഡറാണ് റോയൽ എൻഫീൽഡ്. ആകെ വിപണി വിഹിതത്തിന്റെ 88% കയ്യാളുന്നു.
കമ്പനിയുടെ രണ്ടാമത്തെ സബ് ബ്രാൻഡായ വി.ഇ കൊമേഷ്യൽ വെഹിക്കിൾസും 2026 മാർച്ച് പാദത്തിൽ റെക്കോർഡ് സെയിൽസ് നേടി. ഇക്കാലയളവിൽ 33,976 യൂണിറ്റുകളാണ് വിറ്റഴിച്ചത്. 2025 മാർച്ച് പാദത്തിൽ ഇത് 28,675 യൂണിറ്റുകൾ എന്ന നിലയിലായിരുന്നു.
കമ്പനി മേധാവിയുടെ പ്രതികരണം
തുടർച്ചയായ രണ്ടാമത്തെ വർഷവും 1 ദശലക്ഷത്തിലധികം മോട്ടോർ സൈക്കിൾ യൂണിറ്റുകൾ വില്പന നടത്താൻ കമ്പനിക്ക് സാധിച്ചതായി ഐഷർ മോട്ടോഴ്സ് എം.ഡി ബി. ഗോവിന്ദരാജൻ പറഞ്ഞു. കമ്പനിയെ സംബന്ധിച്ച് ഇത് മികച്ച ഫെസ്റ്റിവൽ സീസണായി മാറി. ആഭ്യന്തര-വിദേശ വിപണികളിൽ റെക്കോർഡ് വോളിയം സെയിൽസ് നടത്താൻ സാധിച്ചതായും അദ്ദേഹം അറിയിച്ചു.
ഐഷർ മോട്ടോഴ്സ് ലാഭവിഹിതം
ഒരു രൂപ മുഖവിലയുള്ള ഓഹരിയൊന്നിന് 82 രൂപ ലാഭവിഹിതം നൽകാൻ കമ്പനി നിലവിൽ തീരുമാനിച്ചിട്ടുണ്ട്. നടക്കാനിരിക്കുന്ന 44ാം വാർഷിക പൊതുയോഗത്തിലെ ഓഹരിയുടമകളുടെ അംഗീകാരത്തിന് വിധേയമായിട്ടാണ് 2025-26 സാമ്പത്തിക വർഷത്തെ അന്തിമ ലാഭവിഹിതം നൽകുക. ഇതിനുള്ള റെക്കോർഡ് ഡേറ്റ് പിന്നീട് അറിയിക്കും. ഷെയർ ഹോൾഡർ അനുമതി ലഭിച്ച് 30 ദിവസത്തിനകം ലാഭവിഹിതം വിതരണം ചെയ്യും.
