മുംബൈ: വാഹന നിർമ്മാതാക്കളായ ഐഷർ മോട്ടോഴ്സിന്റെ സെപ്റ്റംബർ പാദത്തിലെ ഏകീകൃത വരുമാനം 56.5% ഉയർന്ന് 3,519.40 കോടി രൂപയായപ്പോൾ അറ്റാദായം 76% വർധിച്ച് 657 കോടിയായി ഉയർന്നു.
ശക്തമായ പ്രവർത്തന പ്രകടനമാണ് മികച്ച ലാഭം നേടാൻ കമ്പനിയെ സഹായിച്ചത്. അവലോകന പാദത്തിൽ പലിശ, നികുതി, മൂല്യത്തകർച്ച, അമോർട്ടൈസേഷൻ എന്നിവയ്ക്ക് മുമ്പുള്ള വരുമാനം (EBITDA) 821 കോടി രൂപയായി ഉയർന്നു. ഒപ്പം ഇബിഐടിഡിഎ മാർജിൻ 246 ബേസിസ് പോയിൻറ് വർധിച്ച് 23.35% ആയി.
മികച്ച മിശ്രിതവും വിലക്കയറ്റവും പ്രവർത്തന പ്രകടനത്തെ നയിക്കുകയും ഇൻപുട്ട് ചെലവ് പണപ്പെരുപ്പം നികത്തുകയും ചെയ്തതായി ഐഷർ മോട്ടോഴ്സ് പ്രസ്താവനയിൽ പറഞ്ഞു. കമ്പനിയുടെ വിഇ കൊമേഴ്സ്യൽ വെഹിക്കിൾസിൽ നിന്നുള്ള (വിഇസിവി) ലാഭത്തിന്റെ വിഹിതം മുൻ വർഷത്തെ 9.8 കോടി രൂപയിൽ നിന്ന് 44 കോടി രൂപയായി കുതിച്ചുയർന്നു.
മോട്ടോർ സൈക്കിളുകളും വാണിജ്യ വാഹനങ്ങളും നിർമ്മിക്കുന്ന ഒരു ഇന്ത്യൻ മൾട്ടിനാഷണൽ ഓട്ടോമോട്ടീവ് കമ്പനിയാണ് ഐഷർ മോട്ടോഴ്സ് ലിമിറ്റഡ്. മിഡിൽ വെയ്റ്റ് മോട്ടോർസൈക്കിളുകളുടെ നിർമ്മാതാക്കളായ റോയൽ എൻഫീൽഡിന്റെ മാതൃ കമ്പനിയാണ് ഐഷർ.
