ന്യൂഡല്‍ഹി: 3:1 അനുപാതത്തില്‍ ബോണസ് ഓഹരി വിതരണവും 1:2 അനുപാതത്തില്‍ ഓഹരി വിഭജനവും പ്രഖ്യാപിച്ചിരിക്കയാണ് ഈസി ട്രിപ്പ് പ്ലാനേഴ്‌സ്. തുടര്‍ന്ന് ഓഹരി തിങ്കളാഴ്ച 2.5 ശതമാനം ഉയര്‍ന്നു. ഓരോ ഓഹരിയ്ക്കും 3 ബോണസ് ഓഹരികളാണ് കമ്പനി ലഭ്യമാക്കുക.
സമാനമായി, 2 രൂപ മുഖവിലയുള്ള ഓഹരി 1 രൂപ മുഖവിലയുള്ള രണ്ട് ഓഹരികളാക്കി വിഭജിക്കും. 406.80 രൂപയിലാണ് തിങ്കളാഴ്ച ഓഹരി ക്ലോസ് ചെയ്തത്. 2022 ല്‍ മാത്രം 50 ശതമാനം ഉയര്‍ച്ച കൈവരിച്ച സ്‌റ്റോക്കാണ് ഈസി ട്രിപ്പ് പ്ലാനേഴ്‌സിന്റേത്.
മൊണാര്‍ക്ക് നെറ്റ്‌വര്‍ത്ത് ക്യാപിറ്റലിന്റെ 517 രൂപ ലക്ഷ്യവില നിശ്ചയിച്ചുള്ള വാങ്ങല്‍ നിര്‍ദ്ദേശവും ലഭ്യമായി.ബിസിനസിന്റെയും പ്രകടനത്തിന്റെയും കാര്യത്തില്‍ ഗണ്യമായ വളര്‍ച്ച കൈവരിച്ചുവെന്നും ഇത് ഓഹരി വിലയില്‍ പ്രതിഫലിപ്പിക്കാനാഗ്രഹിക്കുന്നുവെന്നും സ്പ്ലിറ്റ്, ബോണസ് ഇഷ്യു നടപടികള്‍ വിശദീകരിച്ച് കമ്പനി പറഞ്ഞു. കൂടുതല്‍ പേര്‍ക്ക് ഓഹരി പ്രാപ്യമാക്കാനും നിലവിലുള്ള ഉടമകള്‍ക്ക് കൂടുതല്‍ പ്രതിഫലം നല്‍കാനും ഇതിലൂടെ സാധിക്കും.
ലാഭത്തില്‍ നിന്ന് സൃഷ്ടിച്ച സൗജന്യ കരുതല്‍ ധനത്തില്‍ നിന്നാണ് ബോണസ് ഷെയറുകള്‍ ഇഷ്യൂ ചെയ്യുക. അംഗീകൃത ഓഹരി മൂലധനം 75 കോടിയില്‍ നിന്ന് 200 കോടി രൂപയാക്കി വര്‍ധിപ്പിക്കാനും ഡയറക്ടര്‍ ബോര്‍ഡ് അംഗീകാരം നല്‍കി.
