രാജ്യത്തെ ഗ്രാമീണ മേഖലകളില്‍ അതിവേഗ ബ്രോഡ്ബാന്‍ഡ് ലഭ്യമാക്കാന്‍ ബിഎസ്എന്‍എല്ലും കേബിള്‍ നിര്‍മ്മാണ കമ്പനിയായ പോളിക്യാബും കൈകോര്‍ക്കുന്നു. കേന്ദ്ര സര്‍ക്കാരിന്റെ ഭാരത് നെറ്റ് ഫേസ്-3 പദ്ധതിക്ക് കീഴില്‍ പതിനായിരം കോടിയോളം രൂപയുടെ കരാറാണ് പോളിക്യാബ് സ്വന്തമാക്കിയത്. ഇതോടെ ഉള്‍നാടന്‍ ഗ്രാമങ്ങളിലും സാധാരണക്കാര്‍ക്ക് താങ്ങാവുന്ന നിരക്കില്‍ ബിഎസ്എന്‍എല്‍ ഭാരത് ഫൈബര്‍ കണക്ഷനും മെച്ചപ്പെട്ട 4G/5G സേവനങ്ങളും ലഭ്യമാകും.
ഇരുവരുടെയും സഹകരണം വിദ്യാര്‍ത്ഥികള്‍ക്കും കര്‍ഷകര്‍ക്കും ചെറുകിട സംരംഭകര്‍ക്കും തുല്യ ഡിജിറ്റല്‍ അവസരങ്ങള്‍ ഉറപ്പാക്കുന്ന പുത്തന്‍ പ്രതീക്ഷയാണ് തുറക്കപ്പെടുന്നത്.
ബിഎസ്എന്‍എല്‍ – പോളിക്യാബ് സഹകരണംകേന്ദ്ര സര്‍ക്കാരിന്റെ ‘ഭാരത് നെറ്റ് ഫേസ്-3’ (BharatNet Phase-III) പദ്ധതിക്ക് കീഴില്‍ രാജ്യത്തെ ഗ്രാമീണ മേഖലകളില്‍ അതിവേഗ ബ്രോഡ്ബാന്‍ഡ് ശൃംഖല നിര്‍മ്മിക്കുന്നതിനാണ് ബിഎസ്എന്‍എല്‍ (BSNL), പ്രമുഖ കേബിള്‍ നിര്‍മ്മാണ കമ്പനിയായ പോളിക്യാബ് ഇന്ത്യയുമായി (Polycab India) സഹകരിക്കുന്നത്.
പ്രൊജക്റ്റ് ഇംപ്ലിമെന്റേഷന്‍ ഏജന്‍സി (PIA) ആയി പോളിക്യാബ് പ്രവര്‍ത്തിക്കും. കൂടാതെ ബിഎസ്എന്‍എല്ലിന്റെ മിഡില്‍-മൈല്‍ (Middle-mile) ഒപ്റ്റിക്കല്‍ ഫൈബര്‍ നെറ്റ്വര്‍ക്ക് ഡിസൈന്‍ ചെയ്യല്‍, കേബിളുകള്‍ വിതരണം ചെയ്യല്‍, സ്ഥാപിക്കല്‍, അപ്ഗ്രേഡ് ചെയ്യല്‍, തുടര്‍പരിപാലനം എന്നിവയും നിര്‍വഹിക്കും.
പ്രധാന ഹൈലൈറ്റുകളും വിശദവിവരങ്ങളും
വിവിധ സംസ്ഥാനങ്ങളിലായി പതിനായിരം കോടിയോളം രൂപയുടെ പദ്ധതികളാണ് പോളിക്യാബിന് ലഭിച്ചിട്ടുള്ളത്. കര്‍ണാടക, ഗോവ, പുതുച്ചേരി മേഖലകള്‍ക്കായി 6,447.54 കോടിയുടെയും, ബിഹാര്‍ മേഖലയ്ക്കായി 3,003 കോടിയുടെയും കരാറുകള്‍ ഇതില്‍ ഉള്‍പ്പെടുന്നു.
ഡിസൈന്‍, ബില്‍ഡ്, ഓപ്പറേറ്റ്, മെയിന്റയിന്‍ (DBOM) മാതൃകയാണ് ഈ കരാര്‍ മുന്നോട്ടുവയ്ക്കുന്നത്. നെറ്റ്വര്‍ക്ക് നിര്‍മ്മാണത്തിനപ്പുറം, അത് പ്രവര്‍ത്തിപ്പിക്കുന്നതും പരിപാലിക്കുന്നതും പോളിക്യാബിന്റെ ചുമതലയാണ്.
നിര്‍മ്മാണ പ്രവര്‍ത്തനങ്ങള്‍ 3 വര്‍ഷത്തിനകം പൂര്‍ത്തിയാക്കണം. തുടര്‍ന്ന് 10 വര്‍ഷത്തേക്ക് നെറ്റ്വര്‍ക്കിന്റെ ഓപ്പറേഷന്‍ ആന്‍ഡ് മെയിന്റനന്‍സ് (O&M) പോളിക്യാബ് നിര്‍വഹിക്കും.
തടസ്സമില്ലാത്ത ഡാറ്റാ കൈമാറ്റത്തിനായി IP-MPLS സാങ്കേതികവിദ്യ, റിംഗ് ടോപ്പോളജി, മികച്ച നിലവാരമുള്ള ഒപ്റ്റിക്കല്‍ ഫൈബര്‍ കേബിളുകള്‍ (OFC), അത്യാധുനിക എക്‌സ്‌ചേഞ്ച് സംവിധാനങ്ങള്‍ എന്നിവ ഉപയോഗിക്കുമെന്ന് കരാര്‍ ഉറപ്പാ്ക്കുന്നു.
സഹകരണം കൊണ്ടുള്ള നേട്ടങ്ങള്‍
ഇരുകൂട്ടര്‍ക്കും കരാര്‍ നേട്ടമാണെന്ന് വിദഗ്ധര്‍ വിലയിരുത്തുന്നു. ബിഎസ്എന്‍എല്ലിനെ സംബന്ധിച്ച് കുറഞ്ഞ മുതല്‍മുടക്കിലും, കാര്യക്ഷമതയോടെയും ഗ്രാമീണ മേഖലകളിലേക്ക് ഒപ്റ്റിക്കല്‍ ഫൈബര്‍ ശൃംഖല വികസിപ്പിക്കാനും, 4G/ 5G മൊബൈല്‍ ടവറുകളെ ഫൈബറുമായി ബന്ധിപ്പിക്കാനും സാധിക്കും.
പോളിക്യാബിന്, രാജ്യത്തെ ഏറ്റവും വലിയ ഒപ്റ്റിക്കല്‍ ഫൈബര്‍ അടിസ്ഥാന സൗകര്യ നിര്‍മ്മാതാക്കളില്‍ ഒന്നായി മാറാന്‍ ഈ കരാര്‍ വഴി സാധിക്കും. കൂടാതെ ഇപിസി (EPC) വിഭാഗത്തില്‍ വലിയ വരുമാന വളര്‍ച്ചയും, 10 വര്‍ഷത്തെ സ്ഥിര വരുമാനവും (OPEX) ഉറപ്പാക്കാനും സാധിക്കും.
ഇന്ത്യയുടെ ഡിജിറ്റല്‍ വിഭജനം കുറയ്ക്കാനും, നഗര- ഗ്രാമ അന്തരം ഇല്ലാതാക്കാനും ഈ ശൃംഖല സഹായകരമാകും.
സാധാരണക്കാര്‍ക്കുള്ള പ്രയോജനങ്ങള്‍
ഗ്രാമങ്ങളിലും അതിവേഗ ഇന്റര്‍നെറ്റ് സാധ്യമാകുമെന്നതാണ് പ്രധാന നേട്ടം. ഉള്‍നാടന്‍ ഗ്രാമങ്ങളിലും നഗരങ്ങള്‍ക്ക് തുല്യമായ ഹൈ-സ്പീഡ് ഒപ്റ്റിക്കല്‍ ഫൈബര്‍ ഇന്റര്‍നെറ്റ് എത്തും. ബിഎസ്എന്‍എല്‍ ഭാരത് ഫൈബര്‍ (Bharat Fibre) സാധാരണക്കാര്‍ക്ക് താങ്ങാവുന്ന നിരക്കില്‍ കൂടുതല്‍ വീടുകളിലേക്ക് നേരിട്ട് എത്തുമെന്നു സാരം.
ബിഎസ്എന്‍എല്‍ മൊബൈല്‍ ടവറുകള്‍ ഫൈബര്‍ വഴി പരസ്പരം ബന്ധിപ്പിക്കുന്നതോടെ കോള്‍ ഡ്രോപ്പ് കുറയുകയും, 4G/ 5G ഡാറ്റാ സ്പീഡ് വര്‍ധിക്കുകയും ചെയ്യും. ഓണ്‍ലൈന്‍ വിദ്യാഭ്യാസം, ടെലിമെഡിസിന്‍, കൃഷി വിവരങ്ങള്‍, ബാങ്കിംഗ്, സര്‍ക്കാര്‍ സേവനങ്ങള്‍ (e-Governance, CSC കേന്ദ്രങ്ങള്‍) എന്നിവ തടസമില്ലാതെ വേഗത്തില്‍ ലഭ്യമാകും.
കേബിളുകള്‍ ഇടുന്നതുമായും തുടര്‍ന്ന് 10 വര്‍ഷത്തെ അറ്റകുറ്റപ്പണികളുമായും ബന്ധപ്പെട്ട് സാങ്കേതിക വിദഗ്ദ്ധര്‍ക്കും, കരാര്‍ തൊഴിലാളികള്‍ക്കും പ്രാദേശികമായി കൂടുതല്‍ തൊഴിലവസരങ്ങള്‍ ലഭിക്കും.
ശ്രദ്ധിക്കേണ്ട കാര്യങ്ങളും വെല്ലുവിളികളും
ഭാരത്നെറ്റ് പദ്ധതിയുടെ മുന്‍ ഘട്ടങ്ങളില്‍ പലപ്പോഴും കാലതാമസം നേരിട്ടിട്ടുണ്ട്. അതിനാല്‍ 3 വര്‍ഷത്തിനുള്ളില്‍ നിര്‍മ്മാണം പൂര്‍ത്തിയാക്കുക എന്നത് പ്രധാന വെല്ലുവിളിയാണ്. ദേശീയപാത, റെയില്‍വേ, വനം വകുപ്പ്, തദ്ദേശ സ്വയംഭരണ സ്ഥാപനങ്ങള്‍ എന്നിവയില്‍ നിന്ന് കേബിളുകള്‍ ഇടുന്നതിനുള്ള അനുമതി വേഗത്തില്‍ ലഭ്യമാക്കേണ്ടതുണ്ട്.
റോഡ് നിര്‍മ്മാണം, ഡ്രെയിനേജ് പ്രവൃത്തികള്‍ എന്നിവ കാരണം ഫൈബര്‍ മുറിയുന്ന സാഹചര്യമുണ്ടായാല്‍ സേവനം തടസപ്പെടാതെ ചുരുങ്ങിയ സമയത്തിനകം പരിഹരിക്കാന്‍ കാര്യക്ഷമമായ നിരീക്ഷണ സംവിധാനം ആവശ്യമാണ്.
മിഡില്‍- മൈല്‍ നെറ്റ്വര്‍ക്ക് പൂര്‍ത്തിയായാലും, അത് സാധാരണ വീടുകളിലേക്ക് എത്തിക്കാന്‍ പ്രാദേശിക കേബിള്‍ ഓപ്പറേറ്റര്‍മാരുമായും, പങ്കാളികളുമായും ഫലപ്രദമായി ഏകോപനം നടത്തേണ്ടതുണ്ട്.
സ്മാർട്ട് മീറ്റർ, ചാർജർ (സ്മാർട്ട്/ ഇവി ചാർജർ), മോഡം എന്നിവ ഒപ്റ്റിക്കൽ ഫൈബർ ശൃംഖലയുമായി ബന്ധിപ്പിച്ച ഒരു ആധുനിക ‘സ്മാർട്ട് ഹോം / സ്മാർട്ട് വില്ലേജ്’ ഇൻഫ്രാസ്ട്രക്ചറും ഇരുവരുടെയും സഹകരണം ലക്ഷ്യം വയ്ക്കുന്നു. ഇതിന്റെ കൂടുതൽ വിവരങ്ങൾ പുറത്തുവരേണ്ടതുണ്ട്.
