കൊച്ചി: തൃശൂർ ആസ്ഥാനമായ ഇസാഫ് സ്മോൾ ഫിനാൻസ് ബാങ്കിന് നടപ്പുസാമ്പത്തികവർഷത്തിലെ രണ്ടാംപാദത്തിൽ 160 കോടി രൂപയുടെ റിക്കാർഡ് അറ്റാദായം.
മുൻപാദത്തെ 80 കോടി രൂപയിൽനിന്ന് ഇരട്ടിയായാണു വളർച്ച. മൊത്തം വായ്പ 25 ശതമാനം വാർഷിക വളർച്ചയോടെ 23,934 കോടി രൂപയും നിക്ഷേപം 24 ശതമാനം വളർച്ചയോടെ 28,466 കോടി രൂപയുമായി. 32 ശതമാനം വളർച്ചയോടെ 15,377 കോടി രൂപയാണ് സുരക്ഷിതവായ്പയായി രേഖപ്പെടുത്തിയത്. മൊത്തം വായ്പയിൽ 64 ശതമാനമാണു സുരക്ഷിതവായ്പ.
സ്വർണവായ്പകൾ 10,000 കോടി രൂപ കവിഞ്ഞു. മൈക്രോഫിനാൻസ് മേഖലയിൽ 134 ശതമാനം വാർഷികവളർച്ച രേഖപ്പെടുത്തി.
കാസ (കറന്‍റ്: സേവിംഗ്സ്) 10 ശതമാനം വാർഷികവളർച്ചയോടെ 6,645 കോടി രൂപയിലെത്തി. ആറു ശതമാനമാണു വളർച്ച. ബാങ്കിന്‍റെ വായ്പാ- നിക്ഷേപ അനുപാതം 82 ശതമാനമാണ്. ഫണ്ടുകൾക്കായുള്ള ചെലവു നീക്കിയിരിപ്പ് മുൻവർഷത്തെ 7.4 ശതമാനത്തിൽനിന്ന് 7.2 ശതമാനമായി കുറഞ്ഞു. മൊത്ത നിഷ്ക്രിയ ആസ്തി 2.8 ശതമാനമായും അറ്റ നിഷ്ക്രിയ ആസ്തി 0.3 ശതമാനമായും മെച്ചപ്പെട്ടു. പലിശവരുമാനം 43 ശതമാനം വളർച്ചയോടെ 1175 കോടി രൂപയായി.
ബാങ്കിന്‍റെ വരുമാനവും ചെലവും തമ്മിലുള്ള അനുപാതം മുൻ വർഷത്തെ 82 ശതമാനത്തിൽനിന്ന് 57.7 ശതമാനമായി മെച്ചപ്പെട്ടു. പ്രവർത്തനലാഭം 289 ശതമാനം വാർഷിക വളർച്ചനേടി 362 കോടി രൂപയിലെത്തി. ആസ്തിവരുമാനം 1.5 ശതമാനമായും ഓഹരി വരുമാനം 26.5 ശതമാനമായും നിലനിർത്തി. മൂലധന പര്യാപ്തതാ അനുപാതം 24.1 ശതമാനവും പണലഭ്യതാ അനുപാതം 141.5 ശതമാനവുമാണ്. അറ്റ ആസ്തി 2027 കോടി രൂപ.
