സെപ്റ്റംബർ പാദത്തിൽ ലോകത്തിലെ ഏറ്റവും മികച്ച കറൻസിയെന്ന അപ്രതീക്ഷിത നേട്ടം സ്വന്തമാക്കി അഫ്ഗാനിസ്ഥാന്റെ കറൻസിയായ അഫ്ഗാനി. ബ്ലൂംബെർഗാണ് ഇക്കാര്യം റിപ്പോർട്ട് ചെയ്തത്.
ഈ കാലയളവിൽ, അഫ്ഗാനി മൂല്യം 9 ശതമാനം ഉയർന്നു, പ്രാഥമികമായി മാനുഷിക സഹായത്തിന്റെ ഗണ്യമായ ഒഴുക്കും, അയൽ ഏഷ്യൻ രാജ്യങ്ങളുമായുള്ള വ്യാപാര പ്രവർത്തനങ്ങളിലെ ഉത്തേജനവുമാണ് ഇതിന് കാരണം.
തങ്ങളുടെ കറൻസിയുടെ നിയന്ത്രണം ഉറപ്പിക്കുന്നതിനായി, താലിബാൻ പ്രാദേശിക ഇടപാടുകളിൽ യുഎസ് ഡോളറിന്റെയും പാകിസ്ഥാൻ രൂപയുടെയും ഉപയോഗം നിരോധിക്കുന്നത് ഉൾപ്പെടെ വിവിധ നടപടികൾ സ്വീകരിച്ചിരുന്നു.
മാത്രമല്ല, രാജ്യത്ത് നിന്ന് യുഎസ് ഡോളർ പുറത്തേക്ക് ഒഴുകുന്നതിന് അവർ കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്. ബ്ലൂംബെർഗ് എടുത്തുകാണിക്കുന്നതുപോലെ, ഓൺലൈൻ കറൻസി വ്യാപാരം ക്രിമിനൽ കുറ്റമാക്കുന്ന നടപടികളിലേക്ക് വരെ ഭരണകൂടം കടന്നിരുന്നു.
ഇത്രയൊക്കെ ആണെങ്കിലും ആഗോളതലത്തിൽ ദാരിദ്ര്യവും കടുത്ത മനുഷ്യാവകാശ ലംഘനങ്ങളും തുടരുന്ന രാഷ്ട്രമായി തന്നെയാണ് അഫ്ഗാൻ ഇപ്പോഴുമുള്ളത്.
അഫ്ഗാനി കഴിഞ്ഞ വർഷം മൂല്യത്തിൽ 14 ശതമാനം നേട്ടം രേഖപ്പെടുത്തിയപ്പോൾ, നിലവിൽ ആഗോള കറൻസി പ്രകടന പട്ടികയിൽ കൊളംബിയയുടെയും ശ്രീലങ്കയുടെയും കറൻസികൾക്ക് പിന്നിൽ മൂന്നാം സ്ഥാനത്താണ് ഉള്ളത്.
അന്താരാഷ്ട്ര ഉപരോധങ്ങൾ മൂലം ആഗോള സാമ്പത്തിക വ്യവസ്ഥയിൽ നിന്ന് അഫ്ഗാനിസ്ഥാൻ ഒറ്റപ്പെട്ടുവെന്ന് അടുത്തിടെ ലോകബാങ്ക് റിപ്പോർട്ടിൽ എടുത്തുകാണിക്കുന്നു.
ഉയർന്ന തൊഴിലില്ലായ്മ നിരക്ക്, മൂന്നിൽ രണ്ട് കുടുംബങ്ങളും അടിസ്ഥാന ആവശ്യങ്ങൾ നിറവേറ്റാൻ ബുദ്ധിമുട്ടുന്നത് എന്നിവ ഉദ്ധരിച്ച റിപ്പോർട്ട് രാജ്യത്തിന്റെ ഭീകരമായ ചിത്രമാണ് വരച്ചു കാട്ടുന്നത്.
ഈ വർഷം അഫ്ഗാനിസ്ഥാന് ഏകദേശം 3.2 ബില്യൺ ഡോളർ സഹായം ആവശ്യമാണെന്ന് ഐക്യരാഷ്ട്രസഭ കണക്കാക്കുന്നു. എന്നിട്ടും ഇതുവരെ 1.1 ബില്യൺ ഡോളർ മാത്രമേ നൽകിയിട്ടുള്ളൂവെന്ന് അന്താരാഷ്ട്ര സംഘടനയുടെ സാമ്പത്തിക ട്രാക്കിംഗ് ഏജൻസി പറയുന്നു.
കഴിഞ്ഞ വർഷം, അഫ്ഗാനിസ്ഥാനിലെ 41 ദശലക്ഷം ആളുകൾ നേരിടുന്ന ഗുരുതരമായ ഭക്ഷ്യ ക്ഷാമ ഭീഷണിയെ നേരിടാൻ ഐക്യരാഷ്ട്രസഭ ഏകദേശം 4 ബില്യൺ ഡോളർ ചെലവഴിച്ചിരുന്നു.
