ബെംഗളൂരു: അതിവേഗ കൊമേഴ്സ് സ്റ്റാര്ട്ടപ്പായ സെപ്റ്റോ 7 ബില്യണ് വാല്വേഷനില് 450-500 മില്യണ് ഡോളര് സമാഹരിക്കുന്നു. പുതിയ മൂല്യം കഴിഞ്ഞവര്ഷത്തെ അപേക്ഷിച്ച് 40 ശതമാനം കൂടുതലാണ്. പുതിയ ഫണ്ടിംഗിന്റെ ഭൂരിഭാഗവും ജനറല് കാറ്റലിസ്റ്റ്, അവനിര് ഗ്രോത്ത് എന്നിവരുടേതായിരിക്കും.
ജനറല് കാറ്റലിസ്റ്റിനും അവെനിര് ഗ്രോത്തിനും പുറമേ, പൊതു വിപണികളില് വൈദഗ്ദ്ധ്യമുള്ള ഒന്നോ രണ്ടോ നിക്ഷേപകര് കൂടി പുതിയ റൗണ്ടില് പങ്കെടുക്കാന് സാധ്യതയുണ്ടെന്ന് കമ്പനി വൃത്തങ്ങളെ ഉദ്ദരിച്ച് ദേശീയ മാധ്യമങ്ങള് റിപ്പോര്ട്ട് ചെയ്തു. കഴിഞ്ഞവര്ഷം 5 ബില്യണ് വാല്വേഷനില് സെപ്റ്റോ 1.35 ബില്യണ് സ്വരൂപിച്ചിരുന്നു.
എറ്റേണലിന്റെ ബ്ലിങ്കിറ്റ്, സ്വിഗ്ഗിയുടെ ഇന്സ്റ്റാമാര്ട്ട് തുടങ്ങിയ കമ്പനികളില് നിന്നും കടുത്ത മത്സരം നേരിടുന്ന കമ്പനി പുതിയ ഫണ്ടിംഗ് റൗണ്ടിലേയ്ക്ക് കടക്കുന്നത്. ബിഗ്ബാസ്ക്കറ്റ്, ഫ്ലിപ്കാര്ട്ട് മിനിറ്റ്സ് തുടങ്ങിയ കമ്പനികള് ബ്രാന്ഡുകളുമായുള്ള തങ്ങളുടെ ബന്ധം പ്രയോജനപ്പെടുത്തി പുതിയ മേഖലകളിലേക്ക് പ്രവേശിക്കുകയും ചെയ്യുന്നുണ്ട്. ഇതും സെപ്റ്റോയ്ക്ക് വെല്ലുവിളി ഉയര്ത്തുന്നു.
മോതിലാല് ഓസ്വാള് ഉള്പ്പടെയുള്ള തദ്ദേശീയ നിക്ഷേപകരില് നിന്നും നിക്ഷേപം നേടാന് കഴിഞ്ഞ മാസങ്ങളില് കമ്പനിയ്ക്കായിരുന്നു. അതേസമയം റോക്കറ്റ് ഇന്റര്നെറ്റ് പോലുള്ള നിക്ഷേപകര് കമ്പനിയിലെ തങ്ങളുടെ ഓഹരികള് വിറ്റഴിക്കുകയും ചെയ്തു.
