മുംബൈ: ആറ് കമ്പനികൾ ഈയാഴ്ച്ച പ്രാഥമിക ഓഹരി വില്പ്പനയുമായി വിപണിയിലേക്ക് എത്തുന്നത്.
കൺസ്യൂമർ-വെയർ കമ്പനിയായ സെല്ലോ വേൾഡ് അതിന്റെ 1,900 കോടി രൂപയുടെ പബ്ലിക് ഇഷ്യു ഒക്ടോബർ 30ന് ആരംഭിക്കും. ഒരു ഓഹരിക്ക് 617-648 രൂപയാണ് പ്രൈസ് ബാൻഡ് നിശ്ചയിച്ചിട്ടുള്ളത്. നവംബർ 1 ന് ഇഷ്യു സമാപിക്കും. മമഎർത്ത് മാതൃകമ്പനിയായ ഹൊനാസ കണ്സ്യൂമറിന്റെ 1,701 കോടി രൂപയുടെ ഐപിഒ ഒക്ടോബർ 31ന് തുടങ്ങും, ഒരു ഓഹരിക്ക് 308-324 രൂപയാണ് നിരക്ക്, നവംബർ 2 ന് ഓഫര് അവസാനിക്കും.
എസ്എംഇ വിഭാഗത്തിൽ, ട്രാൻസ്സ്റ്റീൽ സീറ്റിംഗ് ടെക്നോളജീസിന്റെ 49.98 കോടി രൂപയുടെ ഐപിഒ ഒക്ടോബർ 30 മുതല് നവംബർ 1 വരെ തീയതികളിൽ നടക്കും, ഒരു ഓഹരിക്ക് 67-70 രൂപയാണ് നിരക്ക്. വൃന്ദാവൻ പ്ലാന്റേഷന്റെ 15.29 കോടി രൂപയുടെ ഐപിഒയും ഇതേ ദിവസങ്ങളിലാണ് നടക്കുന്നത്, ഇഷ്യൂ വില ഒരു ഓഹരിക്ക് 108 രൂപയാണ്.
മിഷ് ഡിസൈൻസിന്റെ 9.76 കോടി രൂപയുടെ ഓഫറിന്റെ ബിഡ്ഡിംഗ് ഒക്ടോബർ 31 മുതല് നവംബർ 2 വരെ നടക്കും, ഓഫർ വില ഷെയറൊന്നിന് 122 രൂപയായി നിശ്ചയിച്ചിട്ടുണ്ട്.
എസ്എആർ ടെലിവെഞ്ചറിന്റെ ഐപിഒ നവംബർ 1-3 തീയതികളിൽ നടക്കും. ഒരു ഓഹരിക്ക് 52-55 രൂപ എന്നതാണ് പ്രൈസ് ബാൻഡ്. 24.75 കോടി രൂപയുടെ സമാഹരണമാണ് ലക്ഷ്യമിടുന്നത്.
കഴിഞ്ഞയാഴ്ച തുടങ്ങിയ പാരഗൺ ഫൈൻ, സ്പെഷ്യാലിറ്റി കെമിക്കൽസ് ഐപിഒകള് ഒക്ടോബർ 30-ന് അവസാനിക്കും, ശാന്തല എഫ്എംസിജി പ്രൊഡക്റ്റ്സിന്റെ ഐപിഒ ഒക്ടോബർ 31നും കെകെ ഷാ ഹോസ്പിറ്റൽസിന്റെ ഐപിഒ ഒക്ടോബർ 31നും മൈത്രേയ മെഡികെയറിന്റെ ഐപിഒ നവംബർ 1നും അവസാനിക്കും.
ലിസ്റ്റിംഗിന്റെ കാര്യം നോക്കുകയാണെങ്കില്, ഫാർമ കമ്പനിയായ ബ്ലൂ ജെറ്റ് ഹെൽത്ത്കെയർ നവംബർ 1 ന് T + 3 ടൈംലൈനിൽ അരങ്ങേറ്റം കുറിക്കാൻ സാധ്യതയുണ്ടെന്ന് റിപ്പോര്ട്ടുകള് സൂചിപ്പിക്കുന്നു.
അതേസമയം ഐപിഒ ഷെഡ്യൂൾ പ്രകാരം രാജ്ഗോർ കാസ്റ്റർ ഡെറിവേറ്റീവ്സിന്റെ ട്രേഡിംഗ് ഒക്ടോബർ 31 മുതൽ എൻഎസ്ഇ എമർജിൽ ആരംഭിക്കും.
