ന്യൂഡെൽഹി: 2022 ജൂൺ 30ന് അവസാനിച്ച പാദത്തിൽ 28.54 ശതമാനം വർധനവോടെ 877 കോടി രൂപയുടെ അറ്റാദായം രേഖപ്പെടുത്തി കീടനാശിനി, കാർഷിക രാസവസ്തുക്കൾ എന്നിവയുടെ നിർമ്മാതാക്കളായ യുപിഎൽ. കഴിഞ്ഞ വർഷം ഇതേ പാദത്തിൽ ഇത് 677 കോടി രൂപയായിരുന്നു. അതേപോലെ കമ്പനിയുടെ പ്രവർത്തനങ്ങളിൽ നിന്നുള്ള വരുമാനം മുൻ വർഷം ഇതേ പാദത്തിലെ 8,515 കോടിയിൽ നിന്ന് 27 ശതമാനം ഉയർന്ന് 10,821 കോടി രൂപയായി.
ഈ പാദത്തിലെ ഇബിഐടിഡിഎ 2,343 കോടി രൂപയാണ്. അതേസമയം മാർജിനുകൾ 21.7 ശതമാനമായി ഉയർന്നു. മെച്ചപ്പെട്ട ഉൽപ്പന്ന സാക്ഷാത്കാരങ്ങൾ, അനുകൂലമായ വിനിമയ നിരക്ക്, ഉയർന്ന അളവുകൾ എന്നിവയുടെ പിൻബലത്തിൽ വരുമാനം ശക്തമായി തുടരുകയാണെന്ന് കമ്പനി പ്രസ്താവനയിൽ പറഞ്ഞു.
ഈ ത്രൈമാസത്തിൽ, കമ്പനി ബേയറുമായി പുതിയ വ്യത്യസ്‌ത കീടനിയന്ത്രണ പരിഹാരങ്ങൾ വികസിപ്പിക്കുന്നതിനുള്ള ഒരു പുതിയ വിതരണ കരാറിൽ ഏർപ്പെട്ടിരുന്നു. അതേപോലെ ഈ കാലയളവിൽ ക്രിസ്റ്റ്യൻ ഹാൻസണുമായി സഹകരിച്ച് വിളകളുടെ ആരോഗ്യവും വിളവും വർദ്ധിപ്പിക്കുന്നതിനുള്ള ജൈവപോഷകമായ സോയറ്റിനും യുപിഎൽ പുറത്തിറക്കി.
