വോഡഫോൺ ഐഡിയയിലെ (Vi) കേന്ദ്ര സർക്കാരിന്റെ ഓഹരി പങ്കാളിത്തം 49 ശതമാനത്തിൽ കൂടുതൽ വർദ്ധിപ്പിക്കാൻ ആഗ്രഹിക്കുന്നില്ലെന്ന് ടെലികോം മന്ത്രി ജ്യോതിരാദിത്യ സിന്ധ്യ.
സുപ്രീം കോടതി വിധിയെത്തുടർന്ന് അഡ്ജസ്റ്റഡ് ഗ്രോസ് റെവന്യൂ (AGR) കുടിശ്ശിക ഓഹരികളാക്കി മാറ്റിയതിലൂടെയാണ് സർക്കാരിന് നിലവിൽ കമ്പനിയിൽ 49 ശതമാനം പങ്കാളിത്തം ലഭിച്ചത്. വോഡഫോൺ ഐഡിയയുടെ ഭാവി ഇപ്പോൾ വാഗ്ദാനങ്ങൾ നിറഞ്ഞതായാണ് കാണപ്പെടുന്നതെന്നും സിന്ധ്യ പറഞ്ഞു.
കമ്പനിയുടെ പ്രധാന ഓഹരി ഉടമയാണ് സർക്കാരെങ്കിലും അതിന്റെ മാനേജ്മെന്റിൽ പങ്കാളിയല്ലെന്നും സിന്ധ്യ ഓർമ്മിപ്പിച്ചു. കമ്പനിയുടെ വളർച്ചാ പദ്ധതികൾ തയ്യാറാക്കേണ്ടത് വോഡഫോൺ മാനേജ്മെന്റിന്റെ ഉത്തരവാദിത്തമാണ്.
എജിആർ കുടിശ്ശികയുമായി ബന്ധപ്പെട്ട് സുപ്രീം കോടതി അനുവദിച്ച പരിധിക്ക് അപ്പുറമുള്ള പുതിയ ഇളവുകളൊന്നും എയർടെൽ ഉൾപ്പെടെയുള്ള മറ്റ് കമ്പനികൾക്കും നൽകാൻ ഉദ്ദേശിക്കുന്നില്ലെന്ന് സിന്ധ്യ പറഞ്ഞു. ന്യൂസ് 18 റൈസിംഗ് ഭാരത് സമ്മിറ്റിൽ സംസാരിക്കവെയാണ് അദ്ദേഹം സർക്കാരിന്റെ നയം വ്യക്തമാക്കിയത്.
2025 ഡിസംബർ 31 വരെ വോഡഫോൺ ഐഡിയയുടെ 87,695 കോടി രൂപയുടെ എജിആർ കുടിശ്ശിക കേന്ദ്ര മന്ത്രിസഭ മരവിപ്പിച്ചിട്ടുണ്ട്. ഈ തുക 2032 മുതൽ 2041 വരെയുള്ള സാമ്പത്തിക വർഷങ്ങളിൽ ഘട്ടംഘട്ടമായി തിരിച്ചടയ്ക്കാനാണ് അനുമതി നൽകിയിരിക്കുന്നത്.
ഇതിനുപുറമെ, മുൻകാലങ്ങളിലെ (FY07-FY19) എജിആർ ബാധ്യതകളെക്കുറിച്ച് ടെലികോം വകുപ്പ് (DoT) പുനർനിർണയം നടത്തിവരികയാണ്. ടെലികോം മേഖലയിലെ സുസ്ഥിരമായ മത്സരവും സേവനവും ഉറപ്പാക്കാനാണ് സർക്കാർ ലക്ഷ്യമിടുന്നതെന്നും സിന്ധ്യ പറഞ്ഞു.
മുന്നേറ്റം സാധ്യമോ?
വോഡഫോൺ ഐഡിയ ഓഹരികളുടെ സമീപകാലത്തെ പ്രകടനം സമ്മിശ്രമായ സൂചനകളാണ് നൽകുന്നത്. പ്രൊമോട്ടർമാരിൽ നിന്നും വിദേശ നിക്ഷേപകരിൽ നിന്നും ഏകദേശം 5,836 കോടി രൂപയുടെ മൂലധന നിക്ഷേപം കമ്പനിക്ക് ലഭിച്ചത് പോസിറ്റീവ് ആണ്.
അഡ്ജസ്റ്റ്ഡ് ഗ്രോസ് റെവന്യൂ (AGR) കുടിശ്ശികയിൽ സർക്കാർ അനുവദിച്ച 10 വർഷത്തെ മൊറട്ടോറിയം കമ്പനിക്ക് താൽക്കാലിക ആശ്വാസം നൽകുന്നു. അടുത്ത മൂന്ന് വർഷത്തിനുള്ളിൽ 4G ശൃംഖല ശക്തിപ്പെടുത്തുന്നതിനും 5G സേവനങ്ങൾ ആരംഭിക്കുന്നതിനുമായി 45,000 കോടി രൂപ നിക്ഷേപിക്കാൻ കമ്പനി പദ്ധതിയിടുന്നു.
കമ്പനിയുടെ സാമ്പത്തിക പ്രതിസന്ധികളും കടബാധ്യതകളും നിലനിൽക്കുമ്പോഴും, ചില അനുകൂല ഘടകങ്ങൾ ഓഹരി വിലയിൽ മുന്നേറ്റത്തിന് കാരണമായേക്കാമെന്നാണ് കരുതുന്നത്.
ഓഹരി
കഴിഞ്ഞ ഒരാഴ്ച കാലയളവിൽ ഓഹരി വില ഏകദേശം 7.18 ശതമാനം ഇടിവ് രേഖപ്പെടുത്തി. കഴിഞ്ഞ മൂന്ന് മാസ കാലയളവിൽ ഓഹരി ഏകദേശം 6.77 ശതമാനം മുതൽ 7.64 ശതമാനം വരെ നേട്ടം കൈവരിച്ചിട്ടുണ്ട്.
ഒരു ഘട്ടത്തിൽ 12.80 രൂപ വരെ ഉയർന്ന ഓഹരി പിന്നീട് തിരിച്ചടി നേരിടുകയായിരുന്നു. വോഡഫോൺ ഐഡിയ ഓഹരി ഇന്നലെ (ഫെബ്രുവരി 27) ഒരു ശതമാനത്തോളം ഇടിവില് 10.75 രൂപയിലാണ് വ്യാപരം നടന്നത്.
