ബാംഗ്ലൂർ: കൺവെർട്ടിബിൾ ഡെറ്റ് നോട്ടുകളിലൂടെയും നിലവിലുള്ള ഷെയർഹോൾഡർമാരിൽ നിന്നും 120 മില്യൺ ഡോളറിന്റെ മൂലധനം സമാഹരിച്ചതായി ബിസിനസ്-ടു-ബിസിനസ് ഇ-കൊമേഴ്സ് സ്റ്റാർട്ടപ്പായ ഉഡാൻ അറിയിച്ചു.
ഈ റൗണ്ടോടെ കഴിഞ്ഞ നാല് പാദങ്ങളിൽ കമ്പനി സമാഹരിച്ച മൊത്തം ഫണ്ട് 350 മില്യൺ ഡോളർ കവിഞ്ഞു. കൂടാതെ അടുത്ത 12-18 മാസത്തിനുള്ളിൽ പൊതു വിപണിയിലേക്ക് പ്രവേശിക്കാനാണ് കമ്പനി പദ്ധതിയിടുന്നത്. മൊത്ത മാർജിനിലെയും പ്രവർത്തനച്ചെലവിലെയും ശക്തമായ മെച്ചപ്പെടുത്തലുകളോടെ, കമ്പനി അതിന്റെ യൂണിറ്റ് ഇക്കണോമിക്സ് 10% മെച്ചപ്പെടുത്തിയതായി ഉദാന്റെ ചീഫ് ഫിനാൻഷ്യൽ ഓഫീസറായ ആദിത്യ പാണ്ഡെ പറഞ്ഞു.
കമ്പനിയുടെ നിലവിലെ മൂല്യം 3 ബില്യൺ ഡോളറാണ്. കൂടാതെ ആമസോൺ, ഫ്ലിപ്കാർട്ട്, റിലയൻസിന്റെ ജിയോമാർട്ട് തുടങ്ങിയ ഇ-കൊമേഴ്സ് ഭീമന്മാരുമായി മത്സരിക്കാൻ ഈ ഫണ്ടിംഗ് സ്റ്റാർട്ടപ്പിനെ സഹായിക്കും.
രാജ്യത്തെ 1100-ലധികം നഗരങ്ങളിലായി 3 ദശലക്ഷത്തിലധികം രജിസ്റ്റർ ചെയ്ത ഉപയോക്താക്കളുടെയും 30,000 വിൽപ്പനക്കാരുടെയും ശൃംഖലയാണ് ഇപ്പോൾ ഉഡാനുള്ളത്. കൂടാതെ കമ്പനിയുടെ പ്ലാറ്റ്ഫോമിൽ 3 ദശലക്ഷത്തിലധികം റീട്ടെയിലർമാർ, കിരാന ഷോപ്പുകൾ, കർഷകർ എന്നിവർ പ്രതിമാസം 5 ദശലക്ഷത്തിലധികം ഇടപാടുകൾ നടത്തുന്നു.
