ന്യൂഡല്ഹി: ഫോറെക്സ് പ്രീപെയ്ഡ് കാര്ഡുകള്, സ്റ്റോര് വാല്യൂ കാര്ഡുകള്, ട്രാവല് കാര്ഡുകള് എന്നിവ സംബന്ധിച്ച നിയമം റിസര്വ് ബാങ്ക് ഓഫ് ഇന്ത്യ (ആര്ബിഐ) പരിഷ്ക്കരിച്ചു. പുതിയ നിയമപ്രകാരം ചാര്ജുകളും ഫീസുകളും ഇന്ത്യയില് രൂപയില് മാത്രമേ തീര്പ്പാക്കാന് പാടൂ. ഇത്തരം ചാര്ജുകള് വിദേശ കറന്സിയില് ഈടാക്കുന്നത് കേന്ദ്രബാങ്കിന്റെ ശ്രദ്ധയില് പെട്ടിട്ടുണ്ട്.
ഇന്ത്യയില് നല്കേണ്ട ഫീസ് / ചാര്ജുകള് രൂപയില് മാത്രം നിര്ണ്ണയിക്കുകയും തീര്പ്പാക്കുകയും ചെയ്യണം. വിദേശ രാജ്യങ്ങള് സന്ദര്ശിക്കുമ്പോള് ഇന്ത്യക്കാര് സാധാരണയായി ഫോറെക്സ് പ്രീപെയ്ഡ് കാര്ഡുകള്, സ്റ്റോര് വാല്യൂ കാര്ഡുകള്, ട്രാവല് കാര്ഡുകള് മുതലായവ ഉപയോഗിക്കുന്നു.സാധാരണയായി, യുഎസ് ഡോളര്, ഓസ്ട്രേലിയന് ഡോളര്, യുകെ പൗണ്ട്, യൂറോ, ദിര്ഹം, സിംഗപ്പൂര് ഡോളര് എന്നിവയുള്പ്പെടെയുള്ള വിദേശ കറന്സികളിലാണ് കാര്ഡുകള് നല്കുന്നത്.
കാര്ഡുകള് നല്കുന്നതിന് മുന്കൂര് അനുമതി ആവശ്യമില്ലെന്ന് റിസര്വ് ബാങ്ക് നേരത്തെ വ്യക്തമാക്കിയിരുന്നു. എന്നിരുന്നാലും, അത്തരം കാര്ഡുകളുടെ ഉപയോഗം അനുവദനീയമായ കറന്റ് അക്കൗണ്ട് ഇടപാടുകളില് മാത്രമായി പരിമിതപ്പെടുത്തിയിരിക്കുന്നു. മാത്രമല്ല, കാലാകാലങ്ങളില് ഭേദഗതി ചെയ്യുന്ന ഫോറിന് എക്സ്ചേഞ്ച് മാനേജ്മെന്റ് (കറന്റ് അക്കൗണ്ട് ട്രാന്സാക്ഷന്സ്) റൂള്സ്, 2000 പ്രകാരമുള്ള പരിധികള്ക്ക് വിധേയമാണ് കാര്ഡ് ഇഷ്യു.
