രാജ്യത്തെ മുൻനിര സംയോജിത ബഹുമുഖ ചരക്കുഗതാഗത, വിതരണ ശൃംഖലാ പരിഹാര സ്ഥാപനമായ ട്രാൻസ്‌പോർട്ട് കോർപ്പറേഷൻ ഓഫ് ഇന്ത്യ ലിമിറ്റഡ് (ടിസിഐ), 2026 ജൂൺ 30-ന് അവസാനിച്ച 2026-27 സാമ്പത്തിക വർഷത്തിലെ ആദ്യ പാദത്തിലെ സാമ്പത്തിക ഫലങ്ങൾ പ്രഖ്യാപിച്ചു.
ഈ കാലയളവിൽ കമ്പനിയുടെ ഏകീകൃത വരുമാനം 12,548 ദശലക്ഷം രൂപയായി വർധിച്ചു. മുൻവർഷത്തെ അപേക്ഷിച്ച് 9.1 ശതമാനം വർധനവാണിത്. ഇബിഐടിഡിഎ 5.2 ശതമാനം ഉയർന്ന് 1,599 ദശലക്ഷം രൂപയിലെത്തിയപ്പോൾ, നികുതിക്കുശേഷമുള്ള ലാഭം 0.6 ശതമാനം കുറഞ്ഞ് 1,066 ദശലക്ഷം രൂപയായി. സ്വതന്ത്ര പ്രവർത്തനത്തിലും വരുമാനം 7.5 ശതമാനവും ഇബിഐടിഡിഎ 1.6 ശതമാനവും വർധിച്ചു.
“പ്രതീക്ഷകൾക്കനുസൃതമായ വരുമാനവും ലാഭക്ഷമതയും കൈവരിച്ചുകൊണ്ട് ആദ്യ പാദത്തിൽ സ്ഥിരതയാർന്ന പ്രകടനമാണ് കമ്പനി കാഴ്ചവെച്ചത്. വാഹനമേഖല, ഉപഭോക്തൃ ഉൽപ്പന്നങ്ങൾ, ദ്രുതവാണിജ്യവുമായി ബന്ധപ്പെട്ട നിർവഹണ സേവനങ്ങൾ എന്നിവ മികച്ച വളർച്ച കൈവരിച്ചു.
അതേസമയം രാസവസ്തുക്കൾ, ടൈൽസ്, പാക്കേജിങ് തുടങ്ങിയ ചില മേഖലകളിൽ യുദ്ധസാഹചര്യങ്ങളുടെ സ്വാധീനം അനുഭവപ്പെട്ടെങ്കിലും, വൈവിധ്യമാർന്ന ബിസിനസ് മാതൃകയും രാജ്യവ്യാപകമായ ശൃംഖലയും പ്രവർത്തന സ്ഥിരത ഉറപ്പാക്കാൻ സഹായിച്ചു.” ടിസിഐയുടെ മാനേജിങ് ഡയറക്ടർ വിനീത് അഗർവാൾ പറഞ്ഞു
ഉയർന്ന ഡീസൽ, ബങ്കർ ഇന്ധന വിലകൾ ചെലവിൽ സമ്മർദം സൃഷ്ടിച്ചെങ്കിലും കരാറുകളിലെ വിലക്രമീകരണ സംവിധാനം അതിന്റെ ആഘാതം കുറച്ചതായി അദ്ദേഹം പറഞ്ഞു.
ലാഭക്ഷമത മെച്ചപ്പെടുത്തുന്നതിനും പ്രവർത്തന കാര്യക്ഷമത വർധിപ്പിക്കുന്നതിനും കമ്പനി തുടർന്നും ശ്രദ്ധ കേന്ദ്രീകരിക്കുമെന്നും, ഉത്സവ സീസണിൽ ആവശ്യകത ഉയരുമെന്ന പ്രതീക്ഷയോടെ സാങ്കേതികവിദ്യ, നിർമ്മിത ബുദ്ധി, റൂട്ട് ഒപ്റ്റിമൈസേഷൻ, ഓട്ടോമേഷൻ എന്നിവയിൽ കൂടുതൽ നിക്ഷേപം നടത്തി സേവന നിലവാരവും സുസ്ഥിരതയും ശക്തിപ്പെടുത്തുമെന്നും അദ്ദേഹം കൂട്ടിച്ചേർത്തു.
