മുംബൈ: കാറുകളുടെ വില വർധിപ്പിക്കാനുള്ള നീക്കവുമായി ഇന്ത്യയിലെ മുൻനിര വാഹന നിർമാതാക്കളായ ടാറ്റാ മോട്ടോഴ്‌സ് പാസഞ്ചർ വെഹിക്കിൾസ്. നിർമാണവസ്തുക്കളുടെ വില ഉയർന്ന സാഹചര്യത്തിലാണ് ഇതെന്ന് ടാറ്റ മോട്ടോഴ്‌സ് മാനേജിങ് ഡയറക്ടറും സി.ഇ.ഒ.യുമായ ശൈലേഷ് ചന്ദ്ര പറഞ്ഞു.
അമൂല്യലോഹങ്ങളുടെയും ചെമ്പ് ഉൾപ്പെടെയുള്ളവയുടെയും വിലവർധന നിർമാണച്ചെലവിൽ ഗണ്യമായ വർധനയുണ്ടാക്കി. വാഹനവിലയിലൂടെ ഇതിലൊരുഭാഗം ഉപഭോക്താക്കളിലേക്ക് കൈമാറാൻ നിർബന്ധിതമാകുകയാണ്.
വരുന്ന ആഴ്ചകളിൽ ഇതുസംബന്ധിച്ച പ്രഖ്യാപനമുണ്ടാകുമെന്നും അദ്ദേഹം കൂട്ടിച്ചേർത്തു.
രാജ്യത്തെ ഏറ്റവും വലിയ വാഹന നിർമാതാക്കളായ മാരുതി സുസുക്കിയും വിലവർധന പരിഗണിക്കുന്നതായി സൂചന നൽകിയിട്ടുണ്ട്.
ഏതാനും ദിവസങ്ങൾക്ക് മുമ്പാണ് വാഹന നിർമാണത്തിനുള്ള അസംസ്‌കൃത വസ്തുകളുടെ വില വർധിച്ച് വരുന്നത് വില വർധനവിനെ കുറിച്ച് ചിന്തിക്കാൻ കമ്പനിയെ പ്രേരിപ്പിക്കുന്നുവെന്ന് അറിയിച്ചത്.
