മുംബൈ: 961 MWp ശേഷിയുള്ള സോളാർ പിവി പവർ പ്ലാന്റുകൾ സ്ഥാപിക്കുന്നതിനായി നൈജീരിയൻ സർക്കാരുമായി ധാരണാപത്രം (എംഒയു) ഒപ്പുവച്ച് സ്റ്റെർലിംഗ് ആൻഡ് വിൽസൺ സോളാർ ലിമിറ്റഡിന്റെ (SWSL) യുഎസ് ഉപസ്ഥാപനമായ സ്റ്റെർലിംഗ് ആൻഡ് വിൽസൺ സോളാർ സൊല്യൂഷൻസ് (SWSS). ഈ സോളാർ പിവി പവർ പ്ലാന്റുകൾ സ്ഥാപിക്കുന്നതിനായി 1.5 ബില്യൺ ഡോളറിന്റെ നിക്ഷേപം വേണ്ടി വരും.
ധാരണാപത്രം പ്രകാരം കമ്പനിയുടെ സണ്‍ ആഫ്രിക്കയുമായുള്ള സംയുക്ത സംരംഭമാണ് ഈ പ്രൊജക്ട് നടപ്പിലാക്കുക. 455 മെഗാവാട്ട് ശേഷിയുള്ള ബാറ്ററി എനർജി സ്റ്റോറേജ് സിസ്റ്റങ്ങൾ (BESS) സഹിതം നൈജീരിയയിലെ അഞ്ച് വ്യത്യസ്ത സ്ഥലങ്ങളിൽ ഈ പ്ലാന്റുകൾ സ്ഥാപിക്കുമെന്ന് കമ്പനി റെഗുലേറ്ററി ഫയലിംഗിൽ അറിയിച്ചു.
ഈ പ്രോജക്റ്റുകൾ നൈജീരിയൻ സർക്കാർ ഉടമസ്ഥതയിലുള്ള സ്ഥാപനമായ നൈജർ ഡെൽറ്റ പവർ ഹോൾഡിംഗ് കമ്പനിയുടെ ഉടമസ്ഥതയിലുള്ളതും പ്രവർത്തിപ്പിക്കുന്നതും ആയിരിക്കും. പ്രോജക്‌റ്റുകൾക്കുള്ള ധനസഹായത്തിനായി യുഎസ് എക്‌സിം, ഐഎൻജി, നൈജീരിയ ഗവൺമെന്റ് എന്നിവയുമായി ചർച്ചയിലാണെന്ന് കമ്പനി അറിയിച്ചു.
2015-ൽ സ്റ്റെർലിംഗ് ആൻഡ് വിൽസൺ ഗ്രൂപ്പിന്റെ ഭാഗമായ സ്റ്റെർലിംഗ് & വിൽസൺ റിന്യൂവബിൾ എനർജി ദക്ഷിണാഫ്രിക്കയിലെ ഡി ആറിൽ 90 MWp എന്ന ആദ്യ അന്താരാഷ്ട്ര പദ്ധതിയുമായി ആഫ്രിക്കൻ വിപണിയിലേക്ക് പ്രവേശിച്ചിരുന്നു. നിലവിൽ ഏഴ് രാജ്യങ്ങളിലായി വ്യാപിച്ചുകിടക്കുന്ന 1 GWp-ന്റെ ശക്തമായ പോർട്ട്‌ഫോളിയോ ഉള്ള ഈ മേഖലയിലെ ഏറ്റവും വലിയ സോളാർ ഇപിസി കമ്പനിയാണിത്.
