ജ്വല്ലറി റീട്ടെയില് ശൃംഖല ആയ സെന്കോ ഗോള്ഡ് ലിമിറ്റഡിന്റെ ഇനീഷ്യല് പബ്ലിക് ഓഫര് (ഐപിഒ) ജൂലായ് നാലിന് ആരംഭിക്കും.
ജൂലായ് ആറ് വരെയാണ് സബ്സ്ക്രൈബ് ചെയ്യാവുന്നത്. 301-317 രൂപയാണ് ഓഫര് വില. 47 ഓഹരികള് ഉള്പ്പെട്ടതാണ് ഒരു ലോട്ട്. ജൂലായ് 14ന് ഓഹരികള് സ്റ്റോക്ക് എക്സ്ചേഞ്ചുകളില് ലിസ്റ്റ് ചെയ്യും.
405 കോടി രൂപയാണ് സെന്കോ ഗോള്ഡ് പബ്ലിക് ഇഷ്യു വഴി സമാഹരിക്കുന്നത്. പുതിയ ഓഹരികളുടെ വില്പ്പന വഴി 270 കോടി രൂപയും ഓഫര് ഫോര് സെയില് (ഒ എഫ് എസ്) വഴി 135 കോടി രൂപയും സമാഹരിക്കും.
പ്രൊമോട്ടര്മാരുടെയും നിലവിലുള്ള ഓഹരിയുടമകളുടെയും കൈവശമുള്ള ഓഹരികളാണ് ഒഎഫ്എസ് വഴി വിറ്റഴിക്കുന്നത്.
ഐപിഒയുടെ 50 ശതമാനം നിക്ഷേപക സ്ഥാപനങ്ങള്ക്കും 15 ശതമാനം സ്ഥാപന ഇതര നിക്ഷേപകര്ക്കും 35 ശതമാനം ചില്ലറ നിക്ഷേപകര്ക്കുമായാണ് സംവംരണം ചെയ്തിരിക്കുന്നത്.
പുതിയ ഓഹരികളുടെ വില്പ്പന വഴി സമാഹരിക്കുന്ന തുകയില് 196 കോടി രൂപ പ്രവര്ത്തന മൂലധനത്തിനായി വിനിയോഗിക്കും.
സ്റ്റോറുകളുടെ എണ്ണത്തിന്റെ അടിസ്ഥാനത്തില് കിഴക്കേ ഇന്ത്യയിലെ സംഘടിത ജ്വല്ലറി മേഖലയിലെ ഏറ്റവും വലിയ കമ്പനിയാണ് സെന്കോ ഗോള്ഡ്.
സെന്കോ ഗോള്ഡ് & ഡയമണ്ട്സ് എന്ന ട്രേഡ് നാമത്തില് സ്വര്ണാഭരണങ്ങളും ഡയമണ്ടുകളും മറ്റും വില്പ്പന നടത്തുകയാണ് കമ്പനി ചെയ്യുന്നത്.
13 സംസ്ഥാനങ്ങളിലെ 96 നഗരങ്ങളിലായി 136 ഷോറൂമുകളാണ് കമ്പനിക്കുള്ളത്.
