മുംബൈ: റിലയന്സ് ഗ്രൂപ്പ് ചെയര്മാന് അനില് അംബവനിക്ക് വീണ്ടും തിരിച്ചടി. ആവര്ത്തിച്ച് നിര്ദേശിച്ചിട്ടും, മുന്നറിയിപ്പ് നല്കിയിട്ടും പിഴ തുക അടയ്ക്കാത്തതിനാല് കടുത്ത നടപടി തുടര്ന്ന് മാര്ക്കറ്റ് റെഗുലേററ്റായ സെക്യൂരിറ്റീസ് ആന്ഡ് എക്സ്ചേഞ്ച് ബോര്ഡ് ഓഫ് ഇന്ത്യ (സെബി).
26 കോടി രൂപയുടെ കുടിശിക തിരിച്ചുപിടിക്കാന് റിലയന്സ് ബിഗ് എന്റര്ടെയ്ന്മെന്റിന്റെ ബാങ്ക് അക്കൗണ്ടുകളും, ഷെയറുകളും, മ്യൂച്വല് ഫണ്ട് ഹോള്ഡിംഗുകളും അറ്റാച്ച്മെന്റ് ചെയ്യാനാണ് സെബിയുടെ ഉത്തരവ്.
റിലയന്സ് ഹോം ഫിനാന്സ് ലിമിറ്റഡിലെ (ആര്എച്ച്എഫ്എല്) അനധികൃത ഫണ്ട് വകമാറ്റവുമായി ബന്ധപ്പെട്ട കേസില് 15 ദിവസത്തിനുള്ളില് കുടിശിക അടയ്ക്കാന് മാര്ക്കറ്റ് റെഗുലേറ്റര് നേരത്തെ റിലയന്സ് ബിഗ് എന്റര്ടെയ്ന്മെന്റിന് അന്ത്യശാസനം നല്കിയിരുന്നു.
ഈ വര്ഷം നവംബര് 14- ന് നിലവില് ആര്ബിഇപി എന്റര്ടൈന്മെന്റ് പ്രൈവറ്റ് ലിമിറ്റഡ് എന്നറിയപ്പെടുന്ന റിലയന്സ് ബിഗ് എന്റര്ടൈന്മെന്റ് പ്രൈവറ്റ് ലിമിറ്റഡിന് ഇതു സംബന്ധിച്ച് നോട്ടീസ് അയച്ചിരുന്നു.
നോട്ടീസ് പ്രകാരം റിലയന്സ് 26 കോടി രൂപയാന് കുടിശിക അടയ്ക്കേണ്ടത്. പലിശയും റിക്കവറി ചെലവും ഉള്പ്പെടെ ആണിത്.
പ്രസ്തുത ബാങ്ക്, ഡീമാറ്റ് അക്കൗണ്ടുകളില് നിന്ന് യാതൊരു വിധ ഡെബിറ്റും അനുവദിക്കരുതെന്ന് സെബി ബന്ധപ്പെട്ട ബാങ്കുകള്ക്കും, ഡെപ്പോസിറ്ററികള്ക്കും, മ്യൂച്വല്ഫണ്ട് ഹൗസുകള്ക്കും നിര്ദേശം നല്കിയിട്ടുണ്ട്.
അനധികൃത പണം വകമാറ്റല് കണ്ടെത്തിയതിനെ തുടര്ന്ന് കഴിഞ്ഞയാഴ്ച റെഗുലേറ്റര് മൂന്നു സ്ഥാപനങ്ങള്ക്ക് അറ്റാച്ച്മെന്റ് നോട്ടീസ് അയച്ചിട്ടുണ്ട്. ഏകദേശം 78 കോടി രൂപ മൂല്യം കുടിശിക നോട്ടീസ് ആണ് അയച്ചിരിക്കുന്നത്.
ആധാര് പ്രോജക്ട് മാനേജ്മെന്റ് ആന്ഡ് കണ്സള്ട്ടന്സി പ്രൈവറ്റ് ലിമിറ്റഡ്, ഇന്ത്യന് അഗ്രി സര്വീസ് പ്രൈവറ്റ് ലിമിറ്റഡ്, മോഹന്ബീര് ഹൈടെക് ബില്ഡ് പ്രൈവറ്റ് ലിമിറ്റഡ് എന്നിവയാണ് ഈ സ്ഥാപനങ്ങള്.
ഫണ്ട് വകമാറ്റല് തെളിഞ്ഞതോടെ ഈ വര്ഷം ഓഗസ്റ്റില് വ്യവസായി അനില് അംബാനിയെയും, റിലയന്സ് ഹോം ഫിനാന്സിലെ മുന് പ്രധാന ഉദ്യോഗസ്ഥരും ഉള്പ്പെടെ 24 സ്ഥാപനങ്ങളെ സെബി അഞ്ചു വര്ഷത്തേയ്ക്ക് ഓഹരി വിപണി ഇടപാടുകളില് നിന്നു വിലക്കിയിരുന്നു.
ആവശ്യത്തിന് സമയം അനുവദിച്ചിട്ടും കുടിശിക അടയ്ക്കാത്തതിനെ തുടര്ന്ന് കഴി്ഞ്ഞമാസം അനില് അംബാനിക്കും, ബന്ധപ്പെട്ട കമ്പനികള്ക്കും സെബി അന്ത്യശാസനം നല്കിയിരുന്നു.
വീഴ്ച വരുത്തുന്ന പക്ഷം അറ്റാച്ച്മെന്റ് നടപടികള് സ്വീകരിക്കുമെന്നും അന്നു വ്യക്തമാക്കിയിരുന്നു.
കടുത്ത സാമ്പത്തിക സമ്മര്ദങ്ങള് അകപ്പെട്ട അനില് അംബാനി തിരിച്ചുവരവിനു ശ്രമിക്കുന്നതിനിടെയാണ് പുതിയ സംഭവവികാസങ്ങള്.
കമ്പനികളെ കടരഹിതമാക്കി ശ്രദ്ധ ആകര്ഷിക്കുന്ന തന്ത്രമാണ് നിലവില് അനില് അംബാനി കൈക്കൊണ്ടിരിക്കുന്നത്. പുതിയ സംഭവവികാസങ്ങളുടെ പശ്ചാത്തലത്തില് ഇന്നും റിലയന്സ് ഗ്രൂപ്പ് പോര്ട്ട്ഫോളിയോ ഓഹരികളില് നിക്ഷേപകര് ജാഗ്രത പാലിക്കുന്നത് നല്ലതാണ്.
