മുംബൈ: മോർഗൻ സ്റ്റാൻലിയുടെ പിന്തുണയുള്ള ടെലികോം ഇൻഫ്രാസ്ട്രക്ചർ സ്ഥാപനമായ ഐബസ് ഗ്രൂപ്പിൽ 125 കോടി രൂപ നിക്ഷേപിച്ചതായി അറിയിച്ച് ജപ്പാൻ ആസ്ഥാനമായുള്ള ഗ്ലോബൽ ഫിനാൻഷ്യൽ സർവീസ് ഗ്രൂപ്പായ നോമുറ.
വൈഫൈ നിയന്ത്രിത സേവനങ്ങളിലും മറ്റ് മൂല്യവർദ്ധിത സേവനങ്ങളിലുമുള്ള ഡിജിറ്റൽ ഇൻഫ്രാസ്ട്രക്ചറിന്റെ ഏകീകരണത്തിനും പരിവർത്തനത്തിനും ഈ നിക്ഷേപം ഐബസ്ഗ്രൂപ്പിനെ സഹായിക്കും. കൂടാതെ സിംഗപ്പൂർ, ദുബായ്, യുഎസ് എന്നിവിടങ്ങളിലെ സബ്‌സിഡിയറികളിലൂടെ ആഗോളതലത്തിൽ ഐബസ് ഗ്രൂപ്പിന്റെ സാന്നിധ്യം വിപുലീകരിക്കാനും ഈ ഫണ്ടിംഗ് സഹായിക്കുമെന്ന് കമ്പനി അറിയിച്ചു.
ഒരു ജാപ്പനീസ് ഫിനാൻഷ്യൽ സർവീസ് ഗ്രൂപ്പാണ് നോമുറ ഗ്രൂപ്പ്. ഇത് അതിന്റെ ബ്രോക്കർ-ഡീലർ, ബാങ്കിംഗ്, മറ്റ് ധനകാര്യ സേവന അനുബന്ധ സ്ഥാപനങ്ങൾ എന്നിവയ്‌ക്കൊപ്പം ആഗോള അടിസ്ഥാനത്തിൽ വ്യക്തിഗത, സ്ഥാപന, സർക്കാർ ഉപഭോക്താക്കൾക്ക് നിക്ഷേപം, ധനസഹായം, അനുബന്ധ സേവനങ്ങൾ എന്നിവ നൽകുന്നു.
