നോയൽ ടാറ്റ , ടാറ്റ ഗ്രൂപ്പ് ബോർഡുകളിൽ നിന്ന് പടിയിറങ്ങിയേക്കും എന്ന് സൂചന. 70 വയസ്സാകുന്ന നോയൽ ടാറ്റ , ടാറ്റ ഗ്രൂപ്പിൻ്റെ പ്രായാധിഷ്ഠിത പിന്തുടർച്ച മാനദണ്ഡങ്ങൾ പാലിച്ച് ബോർഡ് സ്ഥാനങ്ങളിൽ നിന്ന് പിൻമാറിയേക്കും എന്നാണ് സൂചന.
ഈ വർഷം നവംബറിൽ നോയൽ ടാറ്റയ്ക്ക് 70 വയസ്സ് തികയും. എക്സിക്യൂട്ടീവുകൾ 65 വയസ്സിൽ പ്രവർത്തനപരമായ റോളുകളിൽ നിന്ന് വിരമിക്കുകയും 70 വയസ്സിൽ ബോർഡ് സ്ഥാനങ്ങളിൽ നിന്ന് പടിയിറങ്ങുകയും ചെയ്യുന്ന ഒരു ഭരണരീതി ടാറ്റ ഗ്രൂപ്പിനുണ്ട്. ഈ രീതി നോയൽ ടാറ്റയും പിന്തുടർന്നേക്കും.
നോയൽ ടാറ്റയുടെ കീഴിൽ, ട്രെന്റിൻ്റെ വരുമാനം 2014 സാമ്പത്തിക വർഷം മുതൽ ഏകദേശം ഒമ്പത് മടങ്ങാണ് വർദ്ധിച്ചത്. രത്തൻ ടാറ്റയുടെ അർദ്ധസഹോദരനായ നോയൽ ടാറ്റ 2024 ഒക്ടോബർ 11-നാണ് ടാറ്റ ട്രസ്റ്റിന്റെ ചെയർമാനാകുന്നത്. ഇപ്പോൾ ഗ്രൂപ്പിന്റെ ജീവകാരുണ്യ പ്രവർത്തനങ്ങൾ കൈകാര്യം ചെയ്യുന്നു.
1999-ൽ നോയൽ ടാറ്റയുടെ അമ്മ സ്ഥാപിച്ച റീട്ടെയിൽ കമ്പനിയായ ട്രെന്റിന്റെ മാനേജിംഗ് ഡയറക്ടറായി ചുമതലയേറ്റതോടെയാണ് കോർപ്പറേറ്റ് യാത്ര ആരംഭിച്ചത്. വെസ്റ്റ്‌സൈഡിനെ ലാഭകരമായ ഒരു സംരംഭമാക്കി മാറ്റുന്നതിൽ നിർണായക പങ്ക് വഹിച്ചു. 2003-ൽ ടൈറ്റൻ ഇൻഡസ്ട്രീസിന്റെയും വോൾട്ടാസിന്റെയും ബോർഡുകളിൽ ചേർന്നു.
2010-ൽ ടാറ്റ ഇന്റർനാഷണലിന്റെ മാനേജിംഗ് ഡയറക്ടറായി, കമ്പനിയുടെ അന്താരാഷ്ട്ര പ്രവർത്തനങ്ങൾക്കും നേതൃത്വം നൽകിയിരുന്നു.
