മുംബൈ: സർക്കാർ പിന്തുണയുള്ള ബാഡ് ബാങ്കായ എൻഎആർസിഎൽ അതിന്റെ ആദ്യത്തെ ഏറ്റെടുക്കൽ നടത്താൻ ഒരുങ്ങുന്നു. കഴിഞ്ഞ ദിവസം നടന്ന ജെയ്‌പീ ഇൻഫ്രാടെക്കിന്റെ കിട്ടാക്കട അക്കൗണ്ട് ഏറ്റെടുക്കുന്നതിനുള്ള സ്വിസ് ചലഞ്ച് ലേലത്തിൽ നാഷണൽ അസറ്റ് റീകൺസ്ട്രക്ഷൻ കമ്പനി (NARCL) വിജയിച്ചു.
ഒരു വർഷം മുൻപാണ് എൻഎആർസിഎൽ രൂപീകൃതമായത്. നവംബർ ആദ്യവാരത്തോടെ നിർദിഷ്ട ഇടപാട് അവസാനിപ്പിക്കാൻ ആകുമെന്ന് സ്ഥാപനം പ്രതീക്ഷിക്കുന്നു. 9,234 കോടി രൂപ മൂല്യമുള്ള കിട്ടാക്കട അക്കൗണ്ട് ആണ് എൻഎആർസിഎൽ ഏറ്റെടുക്കുന്നത്. ഇതിനായി ഒക്‌ടോബർ ആദ്യവാരം ബാഡ് ബാങ്ക് 3,570 കോടി രൂപയുടെ ബിഡ് സമർപ്പിച്ചിരുന്നു.
അതേസമയം ജെയ്‌പീ ഇൻഫ്രാടെക്കിന്റെ കിട്ടാക്കട അക്കൗണ്ടിനായി ഒന്നിലധികം ബിഡുകൾ ലഭിച്ചിരുന്നെകിലും, എൻഎആർസിഎല്ലാണ് ഏറ്റവും കൂടുതൽ തുക വാഗ്ദാനം ചെയ്തതെന്ന് അടുത്ത വൃത്തങ്ങൾ പറഞ്ഞു. ഫീനിക്സ് എആർസി, ആദിത്യ ബിർള എആർസി, എആർസിഐഎൽ എന്നിവയാണ് ജെയ്‌പീ ഇൻഫ്രാടെക്കിനായി താൽപ്പര്യ പ്രകടനങ്ങൾ സമർപ്പിച്ച മറ്റ് കമ്പനികൾ.
