കൊച്ചി: കഴിഞ്ഞ സാമ്പത്തിക വർഷത്തില്‍ ഇന്ത്യയിലെ വ്യാവസായിക മേഖലയിലേക്കുള്ള നേരിട്ടുള്ള വിദേശ നിക്ഷേപത്തില്‍ 51 ശതമാനവും മഹാരാഷ്‌ട്ര, കർണാടക എന്നിവിടങ്ങളിലേക്കാണെന്ന് കേന്ദ്ര സർക്കാർ വ്യക്തമാക്കി.
മഹാരാഷ്ട്രയിലെ വ്യവസായ മേഖലയിലേക്ക് ഇക്കാലയളവില്‍ 1,960 കോടി ഡോളറാണ് നിക്ഷേപം ലഭിച്ചത്. കർണാടകയ്‌ക്ക് നേരിട്ടുള്ള വിദേശ നിക്ഷേപമായി 662 കോടി ഡോളർ നേടാനായി.
ഡെല്‍ഹി, ഗുജറാത്ത്, തമിഴ്‌നാട്, ഹരിയാന, തെലങ്കാന എന്നിവയാണ് തൊട്ടുപിന്നില്‍. മഹാരാഷ്‌ട്രയിലും കർണാടകയിലും പശ്ചാത്തല വികസന രംഗം ഗണ്യമായി മെച്ചപ്പെട്ടതാണ് വിദേശ നിക്ഷേപകരെ ആകർഷിക്കാൻ സഹായിച്ചത്.
കഴിഞ്ഞ സാമ്പത്തിക വർഷത്തില്‍ ഇന്ത്യയിലേക്കുള്ള മൊത്തം വിദേശ നിക്ഷേപം 14 ശതമാനം ഉയർന്ന് 8,104 കോടി ഡോളറിലെത്തി.
