മുംബൈ: ലോക ഓഹരി വിപണിയിൽ പുതിയൊരു ചരിത്രം കുറിച്ചിരിക്കുകയാണ് റിലയൻസ് ഗ്രൂപ്പിന്റെ ടെലികോം-സാങ്കേതികവിദ്യ വിഭാഗമായ ജിയോ പ്ലാറ്റ്‌ഫോംസ്. കമ്പനിയുടെ പ്രാരംഭ ഓഹരി വിൽപ്പനയ്ക്ക് (ഐപിഒ) ഒരു കോടിയിലധികം അപേക്ഷകൾ ലഭിച്ചതോടെ, ആഗോളതലത്തിൽ ഈ നേട്ടം കൈവരിക്കുന്ന ആദ്യ കമ്പനിയായി ജിയോ മാറി. ബിഡ്ഡിംഗ് പൂർത്തിയാകാൻ അഞ്ച് മണിക്കൂർ ശേഷിക്കെയാണ് ഈ നാഴികക്കല്ല് പിന്നിട്ട വിവരം പുറത്തുവന്നത്. മുൻപ് വാരി എനർജീസ് സ്ഥാപിച്ച 97 ലക്ഷം അപേക്ഷകളുടെ റെക്കോർഡാണ് ജിയോ ഇതോടെ മറികടന്നത്.
ബിഡ്ഡിംഗിന്റെ മൂന്നാം ദിനമായ ഒക്ടോബർ 23 ഉച്ചയ്ക്ക് 12.24 വരെ ലഭിച്ച വിവരങ്ങൾ അനുസരിച്ച് ഇഷ്യൂ മൊത്തത്തിൽ 7.41 മടങ്ങ് സബ്‌സ്‌ക്രൈബ് ചെയ്യപ്പെട്ടത്. റീട്ടെയിൽ വിഭാഗത്തിൽ 2.12 മടങ്ങും യോഗ്യതയുള്ള സ്ഥാപന നിക്ഷേപകരുടെ (QIB) വിഭാഗത്തിൽ 15.95 മടങ്ങും സബ്‌സ്‌ക്രിപ്‌ഷൻ രേഖപ്പെടുത്തി. സ്ഥാപനേതര നിക്ഷേപകരുടെ വിഭാഗത്തിൽ 9.86 ഇരട്ടി അപേക്ഷകളാണ് എത്തിയത്.
30,213 കോടി രൂപ സമാഹരിക്കാൻ ലക്ഷ്യമിട്ടുള്ളതാണ് ഈ ഐപിഒ. ഓഹരിയൊന്നിന് 1,065 രൂപ മുതൽ 1,119 രൂപ വരെയാണ് പ്രൈസ് ബാൻഡ് നിശ്ചയിച്ചിരിക്കുന്നത്. 12 ഓഹരികൾ അടങ്ങുന്ന ലോട്ടിന് റീട്ടെയിൽ നിക്ഷേപകർക്ക് ഉയർന്ന വില പരിധിയിൽ കുറഞ്ഞത് 13,428 രൂപ ആവശ്യമായി വരും.
സമാഹരിക്കുന്ന തുകയിൽ 27,500 കോടി രൂപയും ജിയോയുടെ പ്രധാന സബ്സിഡിയറി കമ്പനിയായ റിലയൻസ് ജിയോ ഇൻഫോകോമിന്റെ വായ്പകൾ തിരിച്ചടയ്ക്കാൻ ഉപയോഗിക്കും. ബാക്കി തുക പൊതുവായ കോർപ്പറേറ്റ് ആവശ്യങ്ങൾക്കായി മാറ്റിവെക്കാനാണ് കമ്പനിയുടെ തീരുമാനം.
2019-ൽ പ്രവർത്തനം ആരംഭിച്ച ജിയോ പ്ലാറ്റ്‌ഫോംസ്, ഡിജിറ്റൽ കണക്റ്റിവിറ്റി, സേവനങ്ങൾ, വിപുലമായ സാങ്കേതിക സൗകര്യങ്ങൾ എന്നിവയിലൂടെ ഇന്ത്യയിലെ മുൻനിര ടെക് കമ്പനിയായി വളർന്നിട്ടുണ്ട്.
